Newyddion Diweddaraf Cyngor Sir Y Fflint
Sut all Wythnos Fusnes Sir y Fflint helpuch busnes chi?
Published: 21/07/2014
Mae wythfed Wythnos Fusnes Sir y Fflint yn gwahodd cwmnïau i ddod i arddangos
eu nwyddau a’u gwasanaethau yn yr arddangosfa fusnes eleni.
Coleg Cambria fydd lleoliad yr arddangosfa yn 2014 a gynhelir ddydd Mercher 8
Hydref ac fe’i noddir gan gwmni Westbridge Furniture Designs.
Mae cwmni Westbridge Furniture Designs o Dreffynnon yn cynhyrchu ystod eang o
ddodrefn ar gyfer manwerthwyr o safon ledled y DU ac mae’n gefnogwr brwd i
Wythnos Fusnes Sir y Fflint.
Meddai Prif Weithredwr Westbridge, Stephen Hampton: “Mae Westbridge yn falch o
gael noddi Arddangosfa Wythnos Fusnes Sir y Fflint am yr ail flwyddyn yn
olynol. Mae’r digwyddiad yn gyfle ardderchog i fusnesau lleol gyfathrebu,
cyfarfod ac archwilio cyfleoedd busnes ei gilydd.
“Mae Westbridge wedi cyfalafu ar hyn ac wedi dadorchuddio llawer o botensial
lleol ar gyfer ein cadwyn gyflenwi nad oeddem yn gwybod eu bod yn bodoli o’r
blaen. Mae Wythnos Fusnes Sir y Fflint wedi’i threfnu’n eithriadol o dda ac yn
cael ei rhedeg yn broffesiynol iawn. Rydym yn hynod falch o gael y cyfle i
gymryd rhan eto.”
Bydd dros 70 o stondinau’n arddangos busnesau o bob cwr o’r rhanbarth yn y
digwyddiad yng Nghei Connah a dyma’r arddansgofa fusnes fwyaf o’i bath yng
ngogledd Cymru.
Bydd gweithdai a seminarau yn ymwneud â’r gadwyn gyflenwi a marchnata yn rhedeg
ochr yn ochr â’r arddangosfa.
Meddai’r Cynghorydd Derek Butler, Aelod o’r Cabinet dros Ddatblygu Economaidd:
“Mae’r arddangosfa yn lwyfan gwych i fusnesau lleol hyrwyddo eu hunain. Gall
mynychwyr gyfarfod â staff ar y stondinau a sgwrsio am yr hyn sydd gan bob
busnes i’w gynnig o ran gwasanaethau neu gynnyrch.
“Ceir cyfleoedd gwych i rwydweithio a nod y digwyddiad yw annog cysylltiadau
busnes lleol a rhanbarthol a chodi proffil busnesau o safon yn Sir y Fflint i’r
gynulleidfa ehangaf bosibl.”
I archebu lle arddangos neu i gael gwybodaeth bellach ffoniwch Jen Petrie 01352
703040 neu e-bostiwch jennifer.petrie@flintshire.go.uk