Newyddion Diweddaraf Cyngor Sir Y Fflint
Gwobr y Faner Werdd
Published: 30/07/2014
Mae coedlan yn Sir y Fflint wedi cael cydnabyddiaeth am y chweched flwyddyn yn
olynol gan elusen amgylcheddol amlwg. Enillodd Coed Pen y Maes yn Nhreffynnon
Wobr Gymunedol y Faner Werdd gan ymgyrch Cadw Cymru’n Daclus am fan gwyrdd a
reolir gan grwp gwirfoddol.
Mae Cyfeillion Coed Pen y Maes yn cynnal y safle, sy’n eiddo i’r Cyngor Sir,
gyda chymorth y Ceidwaid Cefn Gwlad.
Partneriaeth sy’n gweithredu drwy’r DU gyfan yw Gwobrau’r Faner Werdd, a Chadw
Cymru’n Daclus sy’n ei weithredu yng Nghymru. Mae’n cydnabod ac yn gwobrwyo’r
parciau a’r mannau gwyrdd gorau yn y wlad ac yn helpu i wella mannau gwyrdd.
Eleni, enillodd 65 o barciau a 37 o fannau gwyrdd a reolir gan y gymuned
gydnabyddiaeth am eu cyfleusterau rhagorol ‘u hymrwymiad i sicrhau’r mannau
gwyrdd gorau i gymunedau Cymru.
Dywedodd y Cynghorydd Bernie Attridge, yr Aelod Cabinet dros yr Amgylchedd: “
Rydym yn hynod falch bod coed Pen y Maes, a gwaith y Cyfeillion, wedi cael
cydnabyddiaeth, unwaith eto, am greu man gwyrdd braf i’r gymuned leol. Hoffwn
ddiolch i Gyfeillion Coed Pen y Maes sy’n gweithio’n galed i gynnal a chadw’r
goedwig, gweithio ar dasgau ymarferol yn y goedwig, gan gynnwys ffensio, plannu
coed, plygu gwrychoedd, rheoli’r goedwig, gwella’r llwybrau troed a chodi
sbwriel.”
Dywedodd Ysgrifennydd Cyfeillion Coed Pen y Maes:
“Bydd ennill y wobr y Faner Werdd, sy’n wobr nodedig iawn, am y chweched
flwyddyn yn olynol, yn hwb mawr i’n criw bach o wirfoddolwyr. Tasg ddiddiolch
yn aml yw cadw’r goedwig yn daclus a chlirio sbwriel ond mae Gwobr y Faner
Werdd yn gwneud y cyfan yn werth yr ymdrech. Mae’r wobr hon yn dilyn ein
llwyddiant yn ddiweddar yng nghystadleuaeth Cymunedau Taclusaf Sir y Fflint ac
mae’n goron ar y cyfan’.”
Mae rhestr o’r holl barciau sydd wedi ennill y Faner Werdd i’w gweld yn
www.keepwalestidy.org/greenflag or www.greenflagaward.org