Newyddion Diweddaraf Cyngor Sir Y Fflint

Safonau Masnach yn helpu dioddefwyr sgamiau i gael eu harian yn ôl

Published: 04/09/2014

Sefydlwyd y Tîm Sgamiau Cenedlaethol gan y Bwrdd Safonau Masnach Cenedlaethol ac mae’n cael ei gynnal gan Safonau Masnach Dwyrain Sussex. Maent yn gweithio mewn partneriaeth â sefydliadau cenedlaethol eraill i ddod o hyd i sgamwyr ac i atafaelu post sgam a’r arian y maent wedi eu cymryd drwy dwyll gan bobl ddiniwed. Mae’r mathau o sgamiau y maent yn dod ar eu traws yn cynnwys honiadau bod pobl wedi ennill loterïau tramor a gwobrau, triniaethau iechyd gwyrthiol a hyd yn oed hawliadau etifeddiaeth ffug. Oherwydd yr addewid o symiau mawr o arian mae rhai pobl yn anfon arian yn y gobaith y byddant yn ennill y gwobrau ffug yma. Mewn rhai achosion lle maer sgam wedi ei ganfod, mae’r Tîm Sgamiau Cenedlaethol wedi gallu adennill arian a dalwyd gan y dioddefwyr. Os yw’r dioddefwr yn byw yn Sir y Fflint, yna bydd swyddog o Safonau Masnach Sir y Fflint yn ymweld â’r dioddefwr i ddarparu cymorth a chyngor iddo ar sut mae sgamiau’n gweithio a sut i’w hadnabod ac, mewn achosion lle mae’r arian wedi ei adennill, yn talu’r arian y maent wedi ei golli yn ôl. Dywedodd y Cynghorydd Kevin Jones, Aelod Cabinet Cyngor Sir y Fflint ar gyfer y Strategaeth Wastraff, Gwarchod y Cyhoedd a Hamdden: “Dyma enghraifft ardderchog o waith partneriaeth rhwng awdurdodau lleol ac asiantaethau gorfodi cenedlaethol. Maen amharu ar y sgamwyr ac yn helpur gwasanaeth Safonau Masnach i’w canfod ac mae hefyd yn cynorthwyo dioddefwyr sgamiau, ac mae rhai ohonynt yn dioddef dro ar ôl tro. Meddai Richard Powell, Arweinydd Tîm Ymchwiliadau Safonau Masnach Sir y Fflint: “Mae sgamiau yn dod yn fwy soffistigedig ac mae hi’n anoddach adnabod y dioddefwyr. Nid yn unig y mae’r prosiect yma’n rhoi cyfle i ddychwelyd arian i ddioddefwyr, ond mae hefyd yn rhoi cyfle i ni eistedd i lawr efo nhw a’u cynghori au haddysgu ar sut i adnabod sgam. Rydym ni’n rhoi diweddariadau wythnosol ar ein tudalen Facebook a Twitter ar y sgamiau diweddaraf a sut i roi gwybod amdanyn nhw, yn ogystal â chymorth ar sut i adnabod ac osgoi sgamiau. I roi gwybod am sgam cysylltwch â Safonau Masnach drwy ffonio Llinell Gymorth Cyngor ar Bopeth ar 03454 04 05 06 neu Action Fraud ar 0300 123 2040 neu ewch i www.actionfraud.police.uk.