Newyddion Diweddaraf Cyngor Sir Y Fflint
MIs Meibion a Merched
Published: 21/10/2015
Mae Tîm Maethu Sir y Fflint yn cefnogi mis Meibion a Merched y Rhwydwaith
Maethu i gydnabod cyfraniad gwerthfawr plant gofalwyr maeth. Bob blwyddyn, ym
mis Hydref, bydd y gwasanaethau maethu drwy’r DU yn cynnal digwyddiadau a
gweithgareddau i gydnabod a gwobrwyo plant a phobl ifanc am groesawu plant
maeth i’w teuluoedd.
Mae Leah Ellison, 23, o’r Wyddgrug wedi bod yn rhan o deulu maeth ers 7
blynedd. Dechreuodd ei rhieni faethu pan oedd yn 16 oed ac maent wedi gofalu am
27 o blant at ei gilydd.
Mae’n dweud bod y profiad o fod yn rhan o deulu maeth wedi bod un gwirioneddol
werthfawr.
”Roeddwn yn unig blentyn felly mae maethu wedi bod yn gyfle i mi osod esiampl i
blant iau. Mae wedi bod yn gyfle i mi fod yn berson y mae plant yn ei edmygu ac
mae hynny, yn ei dro, wedi fy ysbrydoli i fod yn berson gwell,” eglurodd.
“Mae maethu’n brofiad da. Mae’n ddiddorol ac rydych yn dysgu rhywbeth o hyd.
Mae’n anhygoel cael y cyfle i greu perthynas â chynifer o bobl ddiddorol o
wahanol gefndiroedd.
“Doeddwn i ddim yn siwr i ddechrau, ond rwy’n siwr bod hynny’n wir yn achos pob
plentyn sy’n rhan o deulu maeth, ond os rhowch gyfle iddo, fyddwch chi ddim yn
edifarhau.”
Ychwanegodd Leah, sy’n awr yn byw oddi cartref;” Fedra i ddim dychmygu mynd
adref heb weld wynebau gwahanol yn fy nghroesawu a’r cynhesrwydd a’r cariad y
gall plentyn mewn gofal ei gynnig.”
Bydd Tîm Maethu Sir y Fflint yn trefnu tripiau i blant gofalwyr maeth yn ystod
gwyliau’r ysgol i ddiolch iddynt am eu cyfraniad fel rhan o deulu maeth.
Meddai’r Cynghorydd Christine Jones, yr Aelod Cabinet dros Wasanaethau
Cymdeithasol:
“Gwyddom fod plant biolegol gofalwyr maeth yn bwysig iawn yn yr ymdrech i helpu
plant maeth i deimlo’n hapus a diogel, yn enwedig pan fyddant yn cyrraedd ac yn
teimlo’n llawn ofn. Maent yn rhannu eu rhieni, eu teganau a’u cartref felly
mae’n bwysig bod eu cyfraniad yn cael ei gydnabod a’i werthfawrogi.”
I gyd-fynd ag ymgyrch Meibion a Merched y rhwydwaith Maethu, mae Tîm Maethu
Cyngor Sir y Fflint yn cynnal digwyddiad gwybodaeth yn Springfield Hotel ger
Treffynnon am 7pm nos Iau 22 Hydref.
I gael rhagor o wybodaeth, ewch i www.flintshirefostering.org.uk neu ffoniwch
01352
702190.