Newyddion Diweddaraf Cyngor Sir Y Fflint
Gwyl Chwaraeon Ieuenctid
Published: 27/05/2014
Daeth ysgolion o bob cwr o Sir y Fflint ynghyd i gymryd rhan yn yr Wyl
Chwaraeon Ieuenctid eleni. Bu dros 2200 o blant o 64 o ysgolion yn cymryd rhan
mewn 12 digwyddiad, mewn naw lleoliad gwahanol.
Mae’r digwyddiad, a noddir gan Chwaraeon Cymru a’i harwain gan Chwaraeon Sir y
Fflint, yn ei hwythfed blwyddyn a dyma’r digwyddiad mwyaf o’i fath yng Nghymru.
Mae rhan o’r rhaglen yn cynnig hyfforddiant chwaraeon am ddim i blant mewn
campau newydd a thraddodiadol, gan gynnwys pêl-fasged, codi hwyl, dawns stryd,
unihoc, pêl-droed, pêl law, osgoi’r bêl, criced, athletau, pêl-fasged cadair
olwyn, campau sgwter a badminton yn y misoedd yn arwain at y digwyddiad. Yn
ogystal, mae’n rhoi cyfleoedd i blant gymryd rhan mewn clybiau cymunedol lleol,
gan eu hannog i ‘wirioni ar chwaraeon am oes’.
Fe wnaeth Asda gefnogi’r digwyddiad, a gynhaliwyd ddydd Iau 15 Mai, fel rhan
o’u Diwrnodau Chwaraeon Asda Active, dan arweiniad Sports Leaders UK a
ddarparodd hyfforddwyr ac arweinwyr ifanc gwirfoddol. Hefyd, darparont luniaeth
drwy gydol y diwrnod yn un o’r lleoliadau, sef Canolfan Hamdden Glannau
Dyfrdwy.
Meddai’r Cynghorydd Chris Bithell, yr Aelod Cabinet dros Addysg: “Daeth llu o
bobl i’r digwyddiad, roedd plant wedi manteisio ar yr hyfforddiant am ddim a
chawsant ddiwrnod penigamp. Eleni, dyrannwyd gwledydd o’r Gymanwlad i bob ysgol
er mwyn iddynt hyrwyddo Gemau’r Gymanwlad a’r gwaddol a ddaw i Sir y Fflint yn
sgil y gemau a gynhelir yn Glasgow yng Ngorffennaf 2014. Gobeithio y bydd hyn
yn ysbrydoli disgyblion i barhau i fwynhau chwaraeon.”
Meddai Rheolwr Chwaraeon Cymru, Graham Williams: “Mae’n bleser mawr i Chwaraeon
Cymru gefnogi Gwyl Chwaraeon Ieuenctid flynyddol Sir y Fflint unwaith eto.
“Bob blwyddyn, mae’r wyl yn tyfu’n llwyddiannus, gan gyrraedd nifer cynyddol o
bobl ifanc, gyda chyfleoedd newydd ym myd y campau, gan wneud cyfraniad
sylweddol at ein huchelgais, sef cael pob plentyn i wirioni ar chwaraeon am
oes.”