Newyddion Diweddaraf Cyngor Sir Y Fflint

Llwyddiant Ffair Swyddi 

Published: 15/11/2021

Daeth dros 300 o bobl i Ffair Swyddi a gynhaliwyd yng nghanolfan Ty Calon yn Queensferry yn ddiweddar.

Roedd y digwyddiad yn cael ei gynnal gan Gymunedau am Waith ar y cyd â’r Ganolfan Byd Gwaith a Gyrfa Cymru. Dyma’r ffair swyddi gyntaf i bob sector yn Sir y Fflint am bron i 2 flynedd.  

Roedd y Ffair Swyddi wedi’i hanelu at oedolion a phobl ifanc sy’n chwilio am waith a bu’n gydweithrediad llwyddiannus arall.  

Roedd 24 o stondinau yn y digwyddiad, gan gynnwys cyflogwyr oedd â dros 200 o swyddi gwag. Ymysg y cyflogwyr roedd Toyota, KK Fine Foods, Westbridge Furniture, Cyngor Sir y Fflint, Ifor Williams a llawer mwy.

Daeth myfyrwyr o’r coleg lleol yno hefyd i gael gwybod mwy am opsiynau gyrfa a phrentisiaethau sydd ar gael. 

Yn ogystal ag ymgeisio am wahanol swyddi gwag oedd ar gael, roedd rhai oedd yn chwilio am waith yn gallu cyfarfod â chyflogwyr a gofyn cwestiynau iddynt am y tro cyntaf ers dros 2 flynedd oherwydd y pandemig Covid. Roedd Cymunedau am Waith yno i gynnig cymorth cyffredinol am waith ac roedd pobl yn gallu cofrestru ar gyfer y rhaglen ar y diwrnod. 

Dywedodd y Cyng. Derek Butler, Aelod Cabinet Datblygu Economaidd Cyngor Sir y Fflint:

“Roedd y digwyddiad yn llwyddiant mawr – daeth dros 300 o bobl drwy’r drysau. Roedd yn dangos y gwahanol gyfleoedd oedd ar gael yn lleol. Roedd adborth gan gyflogwyr yn dangos bod ansawdd yr ymgeiswyr a’r lefel o ymgysylltu’n uchel. Gan fod ymgeiswyr cystal yno, roed rhai o’r cyflogwyr yn gallu cyfweld pobl ar y diwrnod.”

Mae Cymunedau am Waith a Chymunedau am Waith a Mwy wedi’u bwriadu i ddarparu cymorth cyflogadwyedd a hyfforddiant ym mhob ardal yng Nghymru. Maent yn cael eu darparu’n lleol mewn lleoliadau cymunedol ac mae pobl yn cymryd rhan yn wirfoddol. I gael rhagor o wybodaeth, cysylltwch â: cfwtriage@flintshire.gov.uk.