Arolwg Preswylwyr 2007

Arolwg Preswylwyr Cyngor Sir y Fflint 2007

Dros yr haf 2007 defnyddiodd y Cyngor gwmni ymchwilio annibynnol, BMG Research, i gynnal arolwg preswylwyr. Derbyniodd 3,500 o gartrefi, a ddewiswyd ar hap, holiadur yn gofyn am eu barn am fywyd yn Sir y Fflint ac am gysylltu gyda’r Cyngor.

Bu i gyfanswm o 1,231 o bobl ymateb gan roi cyfradd ymateb eithriadol o dda o 35%. Mae’r gyfradd ymateb hon yn llawer uwch na nifer o arolygon tebyg a gynhaliwyd mewn rhannau eraill o’r DU.

Prif ffocws yr arolwg oedd mesur lefelau boddhad preswylwyr gyda Sir y Fflint fel lle i fyw, gan nodi beth oeddent yn meddwl a oedd yn dda am y Sir ynghyd â phethau i’w gwella. Roedd 78% o breswylwyr yn fodlon â bywyd yn Sir y Fflint a dim ond 5% oedd yn anfodlon. Y pethau yr oeddent yn eu hoffi fwyaf oedd cael mynediad at gefn gwlad a mannau gwyrdd, cludiant cyhoeddus da a chyfleusterau siopa. Y pethau oedd pobl yn credu y dylid eu gwella oedd gweithgareddau i bobl ifanc, lefelau ofn o drosedd, ymddygiad gwrthgymdeithasol a thai fforddiadwy.

Holwyd preswylwyr am eu cymdogaethau ac eto roedd 78% yn fodlon â’u cymdogaethau fel lleoedd i fyw. Cwmpaswyd dau bwnc penodol yn ymwneud â chymdogaethau, canfyddiad pobl o ddiogelwch a glanweithdra, yn yr arolwg. Mae’r ddau yn faes sy’n achosi pryder i breswylwyr Sir y Fflint. Mae hyn yn debyg i farn gyhoeddus ledled y DU.

Gofynnodd yr arolwg hefyd am eu profiadau wrth gysylltu â’r Cyngor. Er bod 62% yn fodlon, roedd 22% yn teimlo bod y Cyngor yn ymdrin ag ymholiadau cwsmeriaid yn wael. Mae’r Cyngor eisoes wedi nodi Gwasanaeth Cwsmeriaid fel blaenoriaeth ar gyfer gwelliant pellach ac mae’n benderfynol o wella profiadau cwsmeriaid ac yna rhoi atborth.

Mae canlyniadau’r arolwg yn rhoi cyfoeth o wybodaeth i’r Cyngor a chaiff ei defnyddio fel sail i gynlluniau’r dyfodol.

Am fwy o wybodaeth fanwl am ganlyniadau’r arolwg, edrychwch ar yr adroddiad crynodeb.

Arolwg Preswylwyr 2007 (563kb)

Gwybodaeth am y wefan

Argaeledd | Amodau a thelerau | Cyfieithiadau | Diogelu Data | Safonau gwasanaeth rhyngrwyd | Ystadegau'r Wefan