Rhiantu corfforaethol yw’r term a ddefnyddir i ddisgrifio cyfrifoldeb Cyngor Sir y Fflint at blant a phobl ifanc sy’n ‘derbyn gofal’, hynny yw, y rhai sydd mewn gofal cyhoeddus.

Mae rhiantu corfforaethol da yn gofyn am waith gan yr awdurdod cyfan i ofalu a gwarchod plant a phobl ifanc sy’n derbyn gofal. Dylai pob aelod o staff, pob Cyfarwyddiaeth, pob maes gwasanaeth a phob Aelod Etholedig ofyn: “Pe byddai hwn yn blentyn i mi a fyddai hyn yn ddigon da iddo?”

Mae gan Aelodau Etholedig rôl arweiniol mewn sicrhau bod Cyngor Sir y Fflint yn gweithredu fel rhiant corfforaethol effeithiol ac yn gweithredu’n bositif i sicrhau’r canlyniadau gorau posibl i blant a phobl ifanc yn derbyn gofal.

Bydd llawer o’r plant yma wedi bod drwy gyfnodau anodd ac angen help oedolion grymus gyda’r cyfrifoldeb o weithredu fel eu rhieni corfforaethol.

Beth yw’r Fforwm Gwasanaethau Plant?

Sefydlodd Cyngor Sir y Fflint y Fforwm Gwasanaethau Plant fis Ebrill 2005. Mae’r Fforwm yn cyfarfod bob chwarter a dyma lle canolbwyntir fwyaf ar wella gwasanaeth ar gyfer plant yn derbyn a rhai sy’n gadael gofal.

Mae’n monitro cynnydd yn erbyn Strategaeth a Chynllun Gweithredu Rhiantu Corfforaethol ac yn derbyn adroddiadau rheolaidd oddi wrth Swyddogion ynghylch y gwasanaethau a ddarperir i bobl ifanc. Gwahoddir Rheolwyr Tîm, Ymarferwyr, Swyddogion Perfformiad a Swyddogion Cynllunio yn rheolaidd i’r Fforwm i gyflwyno adroddiadau ac achosion o ddiddordeb arbennig.

Bydd y Prif Weithredwr, Aelodau Etholedig a Chyfarwyddwyr yn mynychu’r Fforwm yn ogystal â dau o bobl ifanc o’r Grŵp “Speaking Out for Children in Care” a’r Rhwydwaith Cefnogi Gadawyr Gofal.

Mae ymrwymiad gwirioneddol i sicrhau fod plant yn derbyn gofal yn cael eu cynrychioli ar y Fforwm ac yn chwarae rhan arweiniol. Cynhelir cyfarfodydd y tu allan i oriau ysgol, cefnogir pobl ifanc gan aelod o staff ac maen nhw’n cael eu trin fel partneriaid cyfartal.

Yng ngeiriau un person ifanc: “Mae’r Fforwm yn edrych ar stwff fel addysg ac iechyd sy’n bwysig i blant yn derbyn gofal. Mae’n golygu eu bod nhw’n cael y cychwyn gorau posibl mewn bywyd.”

Mae aelodau’r Fforwm yn gofyn yn barhaus: “Pe byddai hwn yn blentyn i mi a fyddai hyn yn ddigon da iddo?” Mewn geiriau eraill, mae’r Fforwm yn hyrwyddo achos plant yn derbyn ac yn gadael gofal. Mae’n goruchwylio sut y mae’r Cyngor yn ysgwyddo ei gyfrifoldebau rhiantu corfforaethol.

Rwy’n Berson Ifanc – Sut alla i gysylltu â’r Fforwm Gwasanaethau Plant?

Os ydych yn blentyn yn derbyn gofal gan Gyngor Sir y Fflint mae gennych linell uniongyrchol i uwch reolwyr a chynghorwyr sir.

Sut?
Drwy’r Fforwm Gwasanaethau Plant?

Be di hwn?
Mae’n grŵp o uwch swyddogion a chynghorwyr sir sy’n cyfarfod bob tri mis i drafod sut y gallwn gyfarfod anghenion plant a phobl ifanc Sir y Fflint.

Beth sydd raid i mi ei wneud?
Os oes gennych gwestiwn neu broblem ynghylch eich gofal, printiwch y cerdyn post isod a’i anfon at y Fforwm – DOES DIM ANGEN STAMP. Bydd y Fforwm yn anfon ateb atoch.

Cerdyn Post Fforwm y Gwasanaethu Plant

Canllaw i bobl ifanc rhianta corforaethol yn Sir y Fflint

Diweddarwyd: 7/30/09 1:15 PM

Gwybodaeth am y wefan