Newyddion Diweddaraf Cyngor Sir Y Fflint
Ffocws Sir y Fflint ar goed
Published: 30/09/2022
Mae gan wefan Cyngor Sir y Fflint fap rhyngweithiol sy’n dangos y coed sy’n destun Gorchmynion Diogelu Coed a’r Ardaloedd Cadwraeth yn y sir lle caiff coed eu diogelu. 
Mae hyn yn caniatáu i gontractwyr coedyddiaeth, perchnogion coed ac aelodau o’r cyhoedd nodi pa goed sy’n cael eu diogelu gan yr Awdurdod Cynllunio Lleol. Gellir lawrlwytho copïau o’r Gorchmynion Diogelu Coed oddi ar y wefan. Mae’r dudalen we hefyd yn cynnwys gwybodaeth ategol ynghylch gofalu am a chynnal a chadw coed.
Yn ei gapasiti fel yr Awdurdod Priffyrdd, mae’r cyngor wedi bod yn arolygu coed ynn aeddfed ar hyd priffyrdd i nodi unrhyw ddirywiad a achoswyd gan glefyd coed ynn. Mae’r cyflwr wedi bod yn bresennol yn y sir ers o leiaf 2015 ac wedi arwain at ddirywiad a marwolaeth miloedd o goed. Mae’r arolwg wedi nodi coed sydd mewn perygl sylweddol ac a allai ddisgyn i’r briffordd. Cynghorir perchnogion y coed hynny i gymryd camau i fynd i’r afael â’r broblem hon.
Yn ystod yr hydref a’r gaeaf, bydd y Cyngor yn cyflwyno rhybuddion cyfreithiol dan y Ddeddf Priffyrdd yn ei gwneud yn ofynnol i berchnogion tir fynd i’r afael â choed anniogel. Os daw hi i’r pen, lle bo perchennog yn methu â mynd i’r afael â’r risg, bydd y Cyngor yn ymgymryd â’r gwaith coed ac yn adennill y costau. Y neges i berchnogion tir yw na fydd y cyngor yn rheoli eich coed, eich cyfrifoldeb chi yw hynny.
Bydd y Cyngor hefyd yn cynnal arolygon coed ar ei dir ei hun ac yn rheoli gwarediad coed ynn wedi’u heintio yn unol â lefel y risg.
Gellir dod o hyd i ragor o wybodaeth am glefyd coed ynn a sut mae’r Cyngor yn ymdrin â’r risgiau sydd ynghlwm â’r clefyd ar wefan y Cyngor.
Bydd Parc Gwepra’n cynnal Diwrnod Coed a Pherllannau ddydd Sul, 9 Hydref, 11am - 3pm. Ymunwch â’r ceidwaid a’r tîm cadwraeth ar gyfer gweithgareddau coediog. Rheoli coetiroedd a pherllannau, arddangosiadau impio, gwasgu afalau a mwy. Diwrnod llawn hwyl i’r teulu, gallwch archebu lle ar y daith a’r sgwrs ar Eventbrite.