Newyddion Diweddaraf Cyngor Sir Y Fflint
Ysgol newydd yn agor ym mis Medi
Published: 11/07/2014
Wrth iddynt edrych ymlaen at symud i mewn i ysgol newydd sbon ym mis Medi, mae
plant yn cofnodi hanes eu dwy ysgol yn Shotton ar gyfer cenedlaethau’r dyfodol
drwy osod arteffactau a chofarwyddion mewn capsiwl amser.
Caiff y capsiwl amser ei gladdu ar safle ysgol gynradd newydd Ty Ffynnon sy’n
werth £6.4m, a fydd yn cymryd lle Ysgol Iau Taliesein ac Ysgol Fabanod Shotton.
Bydd yr adeilad unllawr newydd yn darparu lle i 270 o ddisgyblion cynradd a 30
o ddisgyblion meithrin ac mae wedi’i lunio gan staff Ymgynghoriaeth Eiddo a
Dylunio Cyngor Sir y Fflint o fewn safonau Llywodraeth Cymru ar gyfer ysgolion
yr 21ain ganrif.
Mae ganddi naw o ystafelloedd dosbarth a dau ddosbarth adnoddau i blant ag
anawsterau dysgu cymedrol, meithrinfa, neuadd, stiwdio, cegin a chyfleusterau
cymunedol. Yn yr awyr agored ceir mannau chwarae a hamdden wedi’u tirlunio.
Ariennir yr ysgol ar y cyd gan Gyngor Sir y Fflint a Llywodraeth Cymru ac mae’n
cael ei hadeiladu gan gwmni Read Construction Holdings Ltd o Frymbo.
Meddai’r Pennaeth Helen Hughes:
Cyn bo hir byddwn yn symud i’n hysgol newydd ond roeddem am sicrhau fod
atgofion o’r ddwy ysgol yn cael eu rhoi ar gof a chadw. Mae cwmni Read
Construction wedi cydweithio’n agos â phlant y ddwy ysgol ac wedi ein cynnwys
o’r cyfnodau cynnar. Yn y capsiwl amser bydd eitemau megis cyfnodolion wedi’u
hysgrifennu gan y plant sy’n cofnodi eu hatgofion o’r hen ysgol, copïau o
wasanaeth diolchgarwch diweddar a rhaglen cyngerdd a ffotograffau a lluniau’r
plant.”
Meddai’r Cynghorydd Chris Bithell, Aelod o’r Cabinet dros Addysg yng Nghyngor
Sir y Fflint:
“Mae’r ysgol newydd wedi’i hadeiladu i safon uchel er mwyn darparu cyfleusterau
modern o’r radd flaenaf a’r cyfleoedd dysgu gorau i’n plant. Dymunwn y gorau
i’r staff a’r disgyblion yn eu hamgylchedd newydd”
Meddai’r Rheolwr Masnachol, John Prichard-Taylor o gwmni Read Construction
Holdings Ltd,:
“Mae wedi bod yn bleser o’r mwyaf cael gweithio gyda staff a disgyblion Ysgol
Iau Taliesin ac Ysgol Fabanod Shotton. Rydym yn falch o’ch cyfraniad at
ddarparu cyfleusterau ysgol o’r 21ain ganrif a fydd yn cefnogi addysg o’r radd
flaenaf.”