Newyddion Diweddaraf Cyngor Sir Y Fflint

Canfod fod ardaloedd blodau gwyllt a llai o dorri gwair yn cefnogi llawer mwy o bryfaid mewn astudiaeth Sir y Fflint

Published: 10/11/2026

Mae ardaloedd  blodau gwyllt ac ardaloedd glaswelltir sydd â llai o dorri gwair a reolir gan Gyngor Sir y Fflint, yn cefnogi niferoedd llawer uwch o bryfaid nag ardaloedd ble mae’r gwair yn cael ei dorri, yn ôl astudiaeth newydd.

Yn y blynyddoedd diweddar mae’r Cyngor wedi newid y ffordd o reoli glaswelltir i gefnogi wrth greu cynefin blodau gwyllt. Ers 2019, crëwyd ardaloedd o flodau gwyllt a llai o dorri gwair ar draws 49 hectar o laswelltir a dorrwyd yn flaenorol.

Bu i astudiaeth a gynhaliwyd yr haf hwn asesu sut mae rheolaeth glaswelltir y Cyngor yn dylanwadu ar boblogaethau pryfaid lleol. Roedd y gwaith yn rhan o MSc mewn Cadwraeth a Rheoli Tir a gwblhawyd trwy Brifysgol Bangor.

Roedd yr astudiaeth, a gynhaliwyd rhwng Mai a Gorffennaf 2026, yn golygu 95 o oriau arolwg ar draws chwe safle Cyngor Sir y Fflint, a darparwyd y data lleol cyntaf ar effaith y newidiadau ar natur yn Sir y Fflint.

Cofnodwyd cyfanswm o 3,884 o bryfaid yn ystod yr arolygon ar draws chwe safle, gyda safleoedd blodau gwyllt (ble mae hadau blodau gwyllt brodorol wedi eu cyflwyno) a safleoedd â llai o dorri gwair (ble caniateir i’r gwair dyfu yn ystod yr haf) yn cefnogi niferoedd llawer uwch na glaswelltiroedd oedd yn cael eu torri. Roedd mwy na 91% o gyfanswm y pryfaid a gofnodwyd wedi eu canfod ar draws safleoedd â hadau blodau gwyllt a rhai â llai o dorri gwair, gyda glaswelltiroedd a dorrwyd yn cefnogi ychydig dros 8%.

Bu i safleoedd â llai o dorri gwair yn Sir y Fflint gefnogi 218% yn fwy o anifeiliaid di-asgwrn-cefn na safleoedd ble torrir y gwair a bu i safleoedd â hadau blodau gwyllt nodi 673% yn fwy o anifeiliaid di-asgwrn-cefn na safleoedd ble mae’r gwair yn cael ei dorri. Mae’r canfyddiadau hefyd yn dangos fod glaswelltiroedd gyda llystyfiant uwch yn cefnogi niferoedd uwch o anifeiliaid di-asgwrn-cefn.

Mae dull newydd y Cyngor o reoli glaswelltir yn cael ei arwain gan wyddoniaeth a’r nod yw creu mannau iach, pridd a dwr iach, cefnogi peillwyr lleol a chyflawni buddion ehangach gan gynnwys storio carbon, hidlo llygredd aer, ac arafu amsugno dwr wyneb.

Mae’r camau hyn hefyd yn cefnogi Statws Caru Gwenyn y Cyngor.

Dywedodd y Cynghorydd Chris Dolphin, Aelod Cabinet yr Amgylchedd, Adfywio, Cefn Gwlad a Thwristiaeth:  "Deallir yn fyd-eang fod ardaloedd mwy naturiol o fudd i natur ond mae’n wych gweld tystiolaeth leol sy’n dangos bod y newidiadau hyn yn cael effaith.

“Mae’r ardaloedd hyn o lystyfiant uwch yn gweithio mor galed, gan ddarparu nifer o fuddion, mae’n rhywbeth y mae angen i ni gyd ei gofio pan welwn ardaloedd o wair uwch.”

Ar draws y DU, mae cynefin blodau gwyllt wedi gostwng 98% ers yr Ail Ryfel Byd. Mae pryfaid sy’n hedfan hefyd wedi gostwng 60% dros y 20 mlynedd ddiwethaf. Mae pryfaid yn rhan hanfodol o brosesau naturiol a chynhyrchu bwyd - amcangyfrifir bod un o dair cegaid o fwyd yn cael ei beillio gan bryfyn.

Mae Cyngor Sir y Fflint yn parhau i fod yn ymroddedig i wella lleoedd ar gyfer natur a phobl ar draws y sir a bydd yn parhau i ehangu safleoedd blodau gwyllt ac ardaloedd â llai o dorri gwair ble’n briodol. Trwy wneud penderfyniadau rheoli sy’n seiliedig ar dystiolaeth, mae’r Cyngor yn helpu i greu Sir y Fflint sy’n wydn ar gyfer cenedlaethau'r dyfodol.