Newyddion Diweddaraf Cyngor Sir Y Fflint

Criwiau’r Gwasanaethau Stryd yn cadw Sir y Fflint i symud mewn tywydd eithafol

Published: 11/11/2026

Mae timau Gwasanaethau Stryd Sir y Fflint yn paratoi i gadw gwasanaethau hanfodol yn rhedeg yn ddiogel wrth i’r tywydd eithafol barhau i effeithio ar gymunedau trwy gydol y flwyddyn.

O foreau gaeafol rhewllyd a glaw trwm i boethder yr haf a stormydd dwys, mae criwiau’r Gwasanaethau Stryd yn gweithio gydol y flwyddyn i gynnal y gwasanaethau mae preswylwyr yn dibynnu arnynt.

O gasglu gwastraff y cartref, cynnal priffyrdd, clirio coed sydd wedi disgyn neu ymateb i lifogydd, mae’r timau yn chwarae rhan bwysig wrth gadw Sir y Fflint yn ddiogel, yn lân ac yn symud.

Fodd bynnag, mae tywydd eithafol yn fwy aml yn golygu heriau ychwanegol, ac mae’r Cyngor yn cydnabod bod amddiffyn y gweithlu yr un mor bwysig â chynnal gwasanaethau.

Yn ystod cyfnodau o dywydd garw, mae rheolwyr yn asesu amodau yn barhaus ac yn gwneud addasiadau ymarferol ble fo angen. Gall y rhain gynnwys newid oriau gwaith, adolygu gweithgareddau a gynlluniwyd, darparu cymorth ychwanegol a blaenoriaethu gwaith hanfodol neu waith brys.

Pan fo amodau yn rhy berygl, efallai y bydd angen gohirio gweithgareddau  neu roi trefniadau eraill mewn lle.

Meddai Christopher Goddard, Rheolwr y Gwasanaethau Stryd:  "Mae ein timau Gwasanaethau Stryd yn gweithio ym mhob math o amodau, yn aml y tu ôl i’r llenni, i ddarparu gwasanaethau y mae pobl yn dibynnu arnynt bob dydd. Gall tywydd eithafol wneud gwaith sydd eisoes yn anodd hyd yn oed yn fwy heriol, a rhaid i ni bob amser roi diogelwch ein gweithwyr a’r cyhoedd yn gyntaf.

"Rwy’n ddiolchgar i’r criwiau am eu hymroddiad, a hefyd hoffwn ddiolch i’r preswylwyr am eu hamynedd a’u dealltwriaeth pan fo tywydd garw yn effeithio ar ein gwasanaethau.

"Mae cadw gwasanaethau i fynd yn ystod tywydd anodd yn golygu cynllunio gofalus, gwaith tîm a pharodrwydd i addasu. Mae ein gweithwyr yn cymryd gwir falchder yn y gwaith a wnânt i gymunedau Sir y Fflint. Rydym eisiau sicrhau bod ganddynt y gefnogaeth, yr offer a’r trefniadau gweithio cywir i wneud eu dyletswyddau yn ddiogel.

Mae Cyngor Sir y Fflint hefyd yn annog preswylwyr i gefnogi gweithwyr y Gwasanaethau Stryd trwy ganiatáu i griwiau gael digon o le i weithio’n ddiogel, cymryd gofal o amgylch cerbydau gweithredol a dilyn diweddariadau gwasanaeth yn ystod cyfnodau o darfu.

Meddai’r Cynghorydd Glyn Banks, Aelod Cabinet Gwastraff a Chludiant: “Mae ein timau Gwasanaethau Stryd yn gweithio’n galed i gadw ein gwasanaethau hanfodol ar gael yn ystod amodau heriol, yn aml yn mynd y filltir ychwanegol i gefnogi ein cymunedau.

“Y realiti yw y gall tywydd eithafol cynyddol weithiau achosi tarfu na ellir ei osgoi, ond ein blaenoriaeth bob amser fydd sicrhau diogelwch ein criwiau wrth gynnal gwasanaethau hanfodol ble bynnag fo’n bosib.

“Hoffwn ddiolch i’n gweithlu am eu hymrwymiad parhaus, ac i’r preswylwyr  am eu cefnogaeth a’u hamynedd pan fo tywydd garw yn effeithio ar wasanaethau.”

Gall preswylwyr weld y wybodaeth ddiweddaraf am y gwasanaeth ar wefan a sianeli cyfryngau cymdeithasol y Cyngor.