Newyddion Diweddaraf Cyngor Sir Y Fflint
Cynlluniau Creu Lleoedd wedi’u mabwysiadu ar gyfer y Fflint a’r Wyddgrug
Published: 17/11/2026
Mae cynlluniau i gryfhau canol trefi y Fflint a’r Wyddgrug, dathlu eu hunaniaeth unigryw a helpu i arwain eu datblygiad yn y dyfodol, wedi eu mabwysiadu’n ffurfiol.
Y Fflint a’r Wyddgrug yw’r ddwy dref olaf yn y sir i fabwysiadu Cynlluniau Creu Lleoedd, ar ôl cwblhau cynlluniau ar gyfer Treffynnon, Cei Connah, Bwcle, Shotton a Queensferry.
Mae cymeradwyo’r cynlluniau gan Gabinet Cyngor Sir y Fflint yn dilyn ymgysylltu helaeth â chymunedau lleol, busnesau a phartneriaid eraill i helpu i siapio gweledigaeth a rennir ar gyfer y ddwy dref.
Mae’r cynlluniau yn adnabod cryfderau’r trefi yn ogystal â heriau, ac yn nodi gweledigaeth hirdymor a blaenoriaethau ar gyfer y ddwy dref. Byddant yn cael eu cefnogi gan gynlluniau gweithredu cynhwysfawr.
Mae cyllid ar gyfer datblygu’r saith cynllun wedi dod o Gronfa Ffyniant Gyffredin Llywodraeth y DU a rhaglen Trawsnewid Trefi Llywodraeth Cymru.
Ar gyfer y Fflint, bu i ymgysylltu ganfod dyhead i gryfhau ei hunaniaeth fel tref sirol, sefydlu cysylltiadau cryfach rhwng canol y dref, y castell a glan y môr, yn dathlu ei threftadaeth gyfoethog ac ymdrin â heriau gan gynnwys nifer yr eiddo gwag.
Cyflwynwyd y Cynllun Creu Lleoedd drafft ar gyfer y Fflint i’r cyhoedd yn gynharach eleni, gyda 84% o’r rhai a ymatebodd yn cefnogi’r blaenoriaethau a gynigir.
Yn yr Wyddgrug, bu i’r ymgysylltu a’r ymgynghori amlygu cyfleoedd i ddatblygu ei hunaniaeth fel tref farchnad a chymeriad annibynnol canol y dref, yn ogystal â’i threftadaeth a’i diwylliant.
Mae Cynllun Creu Lleoedd yr Wyddgrug yn canolbwyntio ar wella pyrth allweddol i’r dref, gwella cysylltiadau a gwella mannau cyhoeddus.
Yn yr ymgynghoriad ar y Cynllun drafft bu i 86% o ymatebwyr gefnogi’r blaenoriaethau.
Dywedodd y Cynghorydd Chris Dolphin, Aelod Cabinet yr Amgylchedd, Adfywio, Cefn Gwlad a Thwristiaeth: “Mae mabwysiadu’r Cynlluniau Creu Lleoedd ar gyfer y Fflint a’r Wyddgrug yn nodi carreg filltir bwysig, nid yn unig i’r trefi hyn ond i Sir y Fflint gyfan. Bellach mae gennym set lawn o saith Cynllun sy’n rhoi fframwaith clir i ni, a arweinir gan y gymuned ar gyfer datblygiad ein canol trefi yn y dyfodol.
“Mae gan bob tref ei chryfderau a’i chymeriad unigryw, ac mae’r Cynlluniau terfynol yn nodi sut y byddwn yn datblygu’r rhain i greu lleoedd deniadol sy’n ffynnu i bobl fyw, gweithio ac ymweld â nhw am flynyddoedd i ddod.”