Alert Section

Newyddion Diweddaraf Cyngor Sir Y Fflint


Sir y Fflint i gael cyfran o £20m o gyllid i drawsnewid bysiau

Published: 18/11/2026

Mae Sir y Fflint yn mynd i elwa o gyfran o £20 miliwn o gyllid arfaethedig i wella cysylltiadau bysiau rhwng cymunedau lleol a safleoedd cyflogaeth.

Mae’r cyllid yn ffurfio rhan o Raglen Trawsnewid Bysiau Parth Buddsoddi Sir y Fflint a Wrecsam, sy’n cael ei gefnogi gan Lywodraeth Cymru a Llywodraeth y DU.

Nod y rhaglen yw gwella cysylltiadau cludiant cyhoeddus i brif gyrchfannau cyflogaeth, yn cynnwys Parc Diwydiannol Glannau Dyfrdwy ac Ystâd Ddiwydiannol Penarlâg, gan helpu pobl i gael mynediad at gyfleoedd swyddi a hyfforddiant.

Os caiff ei gymeradwyo, byddai’r cyllid yn cefnogi amryw o welliannau sydd wedi’u dylunio i wneud teithio ar fysiau yn fwy hygyrch, dibynadwy a chyfleus.

Mae cynigion yn cynnwys cynyddu gwasanaethau i brif ardaloedd cyflogaeth, a chyflwyno llwybrau newydd ac estynedig gan gysylltu cymunedau megis Treffynnon, yr Wyddgrug a Bwcle gyda phrif safleoedd cyflogaeth.

Mae yna hefyd gynlluniau i gyflwyno gwasanaethau cynharach, hwyrach a thros y penwythnos i allu gwasanaethu patrymau sifft gwahanol.

Meddai’r Cynghorydd Dave Hughes, Arweinydd Cyngor Sir y Fflint: “Mae’r cyllid arfaethedig yn gyfle cyffrous i wella cludiant cyhoeddus ar hyd a lled Sir y Fflint a’i gwneud hi’n haws i bobl gael mynediad at gyflogaeth, addysg a hyfforddiant.  Bydd hefyd yn galluogi teithio mwy cynaliadwy i’r gwaith ac yn ôl i nifer o bobl.

“I nifer o bobl, gall argaeledd gwasanaeth bws dibynadwy olygu’r gwahaniaeth rhwng cael swydd a methu allan. Dwi’n gobeithio y bydd y gwelliannau yma sydd wedi’u cynllunio yn helpu i greu cyfleoedd i lawer mwy o bobl, tra’n helpu cyflogwyr i gysylltu â charfan ehangach o dalent.”

Mae Trafnidiaeth Cymru yn gwahodd pobl sy’n gweithio yn y Parth Buddsoddi ar hyn o bryd i gymryd rhan mewn arolwg teithio byr i helpu i lywio gwasanaethau cludiant yn y dyfodol a deall anghenion teithio lleol yn well. Bydd unrhyw un sy’n llenwi’r arolwg erbyn 13 Rhagfyr 2026 yn cael eu cynnwys mewn cystadleuaeth gan Drafnidiaeth Cymru i ennill e-daleb  gwerth £250. Mae’r arolwg ar gael yma.