Newyddion Diweddaraf Cyngor Sir Y Fflint
Cabinet yn cymeradwyo Strategaeth Drawsnewid Strategol ddrafft
Published: 20/11/2026
Mae adborth gan breswylwyr wedi helpu i lywio cynlluniau Cyngor Sir y Fflint i wella a moderneiddio gwasanaethau dros y blynyddoedd sydd i ddod.
Yn dilyn newidiadau a wnaed ar ôl ymgynghoriad cyhoeddus, mae’r Strategaeth Drawsnewid Strategol ddrafft ar gyfer 2026 i 2029 bellach wedi cael ei chymeradwyo gan y Cabinet.
Mae’r strategaeth yn nodi sut y bydd y Cyngor yn cyflwyno rhaglen drawsnewid gynhwysfawr i ymateb i’r galw cynyddol am wasanaethau o dan bwysau ariannol parhaus.
Cynhaliwyd ymgynghoriad cyhoeddus ar y strategaeth ddrafft rhwng mis Medi a mis Hydref i gasglu barn preswylwyr, a chafodd aelodau etholedig, gweithwyr a budd-ddeiliaid eraill gyfleoedd i roi adborth ar y ddogfen.
Mae’r newidiadau a wnaed ar ôl yr ymgynghoriad yn cynnwys diweddariadau i’r blaenoriaethau trawsnewid i bwysleisio meithrin gwytnwch cymunedol, yn ogystal â newidiadau i weledigaeth ac amcanion cyffredinol.
Dywedodd y Cynghorydd Richard Jones, Dirprwy Arweinydd y Cyngor ac Aelod Cabinet Trawsnewid, Twf a Lle: “Fe hoffwn ddiolch i bawb a dreuliodd amser yn ymgysylltu gyda’r ymgynghoriad a rhannu eu barn am y strategaeth ddrafft.
“Fel Cynghorau ar draws y wlad, rydym ni’n parhau i wynebu heriau ariannol sylweddol ynghyd â’r galw am wasanaethau.
“Ni ellir diwallu’r angen i gydbwyso’r gyllideb bob blwyddyn drwy wneud gostyngiadau o fewn gwasanaethau unigol yn unig. Drwy ein Rhaglen Drawsnewid Strategol, gallwn fabwysiadu dull tymor hwy, gan ganolbwyntio ar brosiectau sawl blwyddyn a sicrhau newid ar draws y sefydliad cyfan, rhywbeth nad yw bob amser wedi bod yn bosibl yn y gorffennol.”
Gallai unrhyw gynigion y dyfodol a allai olygu newidiadau i wasanaethau neu bolisïau fod yn amodol ar eu hasesiadau a’u prosesau ymgynghori eu hunain.