Newyddion Diweddaraf Cyngor Sir Y Fflint
Gwaith celf newydd - ysgol newydd
Published: 30/09/2014
Mae ysgol newydd wedi dathlu tymor newydd gyda gwaith celf arbennig a grëwyd
gan y disgyblion ac artist preswyl lleol.
Cafodd disgyblion o’r datblygiad newydd gwerth £6.4m, sef Ysgol Ty Ffynnon yn
Shotton a agorwyd ar ddechrau mis Medi, gyfle i weithio ochr yn ochr â’r artist
tecstiliau proffesiynol Cefyn Burgess.
Bu plant yr adran iau yn dylunio a chreu collages deunyddiau yn cynrychioli
storïau a ysbrydolwyd gan chwedlau ‘Talieisin’, sef enw’r ysgol iau wreiddiol
ar y safle a ddymchwelwyd er mwyn gwneud lle i’r adeilad newydd. Bu’r babanod
yn rhannu eu hatgofion arbennig o Shotton a’u Hysgol Fabanod.
Aeth Arweinydd y Cyngor, Cadeirydd Llywodraethwyr yr Ysgol a swyddogion y
cyngor ar ymweliad i’r ysgol i weld y gwaith celf ac i edrych ar yr adeilad
newydd mewn grym.
Mae’r ysgol fodern yn cymryd lle Ysgol Fabanod Shotton ac Ysgol Iau Taliesin ac
mae lle yno i 245 o ddisgyblion cynradd a 30 o ddisgyblion meithrin. Lluniwyd
yr ysgol i safonau ysgol yr 21ain ganrif Llywodraeth Cymru gan staff
Ymgynghoriad Eiddo a Dylunio Cyngor Sir y Fflint.
Arianwyd yr ysgol ar y cyd gan Gyngor Sir y Fflint a Llywodraeth Cymru ac fe’i
hadeiladwyd gan gwmni adeiladu Read Construction Holdings Ltd o Frymbo.
Meddai’r Pennaeth Helen Hughes: “Mae’r disgyblion wedi gweithio’n galed iawn i
greu’r darnau hyfryd hyn o waith celf sy’n cyfarch ymwelwyr yn nerbynfa ein
hysgol newydd. Mae chwedlau ‘Taliesin’ a ‘Shotton’ yn cysylltu hanes yr ardal
â’r ddwy ysgol yn yr adeilad newydd gyda’i gilydd.”
Meddai’r Cynghorydd Aaron Shotton, Arweinydd y Cyngor: “Er gwaethaf cyfnodau o
gyni cyllidol rydym yn falch iawn o ddarparu’r ysgol newydd hon. Mae’n adeilad
gwych ac yn lle ysbrydoledig i ddisgyblion ddysgu. Mae’r artist Cefyn Burgess
wedi creu celf hyfryd gyda’r disgyblion a oedd yn barod iawn i ddangos eu
gwaith a’u hysgol newydd i ni.”
Mae’r cynllun artist preswyl wedi’i ariannu’n rhannol gan Gyngor Celfyddydau
Cymru a Chyngor Sir y Fflint ac wedi’i gydgysylltu gan Is-adran y Celfydyddau,
Diwylliant a Digwyddiadau Cyngor Sir y Fflint.