Newyddion Diweddaraf Cyngor Sir Y Fflint

Gwobrau Busnes Sir y Fflint

Published: 01/10/2014

Mae’r dyddiad ar gyfer cyflwyno ceisiadau ar gyfer seithfed digwyddiad blynyddol Gwobrau Busnes Sir y Fflint, ar y cyd â chwmni AGS Security Systems Ltd, bellach wedi cau. Mae’n amser nawr i’r beirniaid benderfynu pa fusnesau ac entrepreneuriaid lleol sy’n haeddu clod yn 2014. Mae amrywiaeth eang o geisiadau o safon uchel wedi’u derbyn yn Sir y Fflint a bydd 2014 yn flwyddyn wych i Wobrau Busnes Sir y Fflint. Derbyniwyd y nifer uchaf erioed o geisiadau, sy’n amlygu pa mor berthnasol a phwysig yw’r gwobrau i’r gymuned fusnes gyfan. Bydd deg beirniad yn cael tan 10 Hydref i arfarnu pob ymgais a gyflwynwyd yn ôl pob categori. Bydd holl ymgeiswyr 2014 yn mynychu Cinio Gala’r seremoni wobrwyo yn Soughton Hall, Llaneurgain nos Wener 17 Hydref lle bydd yr enillwyr cyffredinol yn cael eu cyhoeddi. Meddai’r Cynghorydd Derek Butler, Aelod o’r Cabinet dros Ddatblygiad Economaidd: “Rydym yn hynod falch o’r ymateb yr ydym wedi’i gael i seithfed digwyddiad blynyddol Gwobrau Busnes Sir y Fflint ac mae cyfanswm uchel y ceisiadau yn adlewyrchu hynny. Mae’n dangos pa mor bwysig yw Gwobrau Busnes Sir y Fflint i’r rhanbarth hwn. “Mae’r digwyddiad yn tyfu bob blwyddyn, ac rydym yn edrych ymlaen yn fawr iawn i arddangos y cwmnïau bywiog hyn yng Nghinio Gala’r Seremoni Wobrwyo ar 17 Hydref yn Soughton Hall.” Mae tocynnau ar gyfer y Cinio Gala, sy’n ddigwyddiad tei du, yn costio £65 neu £600 am fwrdd i 10. I neilltuo lleoedd ffoniwch Kate Catherall ar 01352 703221.