Newyddion Diweddaraf Cyngor Sir Y Fflint

Wythnos Genedlaethol Ymwybyddiaeth i Droseddau Casineb 2014

Published: 13/10/2014

Gweld, Clywed, Riportio” – dyna yw neges Wythnos Genedlaethol Ymwybyddiaeth o Droseddau Casineb a gynhelir rhwng 11 a 18 Hydref. Fel rhan o ymgyrch genedlaethol Llywodraeth Cymru, mae Cyngor Sir y Fflint, Partneriaeth Diogelwch Cymunedol Sir y Fflint a’i bartneriaid ledled y Gogledd, wedi dod at ei gilydd i dynnu sylw at broblemau troseddau casineb ac i annog pobl i roi gwybod i’r heddlu amdanynt. Caiff y neges ei hysbysebu ar fysiau, gorsafoedd radio cymunedol lleol, cyfryngau cymdeithasol ac yn ystod digwyddiadau lleol. Trwy gydol yr wythnos bydd partneriaid o bob cwr o ogledd Cymru yn gweithio gyda grwpiau lleol a sefydliadau cymunedol i godi ymwybyddiaeth ac i annog pobl i roi gwybod am droseddau casineb. Byddant hefyd yn hyrwyddo gwasanaethau cymorth ac adnoddau sydd ar gael yn lleol. Mae troseddau casineb yn droseddau yn erbyn unigolion neu grwpiau o bobl yn seiliedig ar eu hunaniaeth neu eu gwahaniaethau canfyddedig. Gallant fod yn weithredoedd treisgar, gmaentelyniaethus neu gamwahaniaethol. Mae’n bosibl y bydd dioddefwyr yn cael eu bwlio, eu haflonyddu neu eu camdrin oherwydd pwy ydyn nhw, eu rhywioldeb, eu rhyw, eu crefydd, eu hethnigrwydd neu y ffordd y maent yn dewis byw. Yn 2013 cafodd 397 achos o droseddau casineb eu hadrodd wrth yr heddlu ledled gogledd Cymru. Gall y troseddau fod yn gamdriniaeth lafar, graffiti ymosodol, bygythiadau, difrod i eiddo, ymosodiadau, bwlio seibr, negeseuon testun, e-bost neu alwadau ffôn ymosodol. Mae pob un yn annerbyniol ac ni ddylid eu goddef. Cafodd ffilm fer ei gwneud gan brosiect Achub y Plant ‘Travelling Ahead’ dan y teitl ‘Young Gypsies and Travellers Talk About Hate Crime’. Cyfrannodd bobl ifanc o Sir y Fflint at y ffilm gyda chymorth Gwasanaeth Addysg i Deithwyr Sir y Fflint a Gwasanaethau Ieuenctid Sir y Fflint drwy’r grwp merched ITD (Inspirational Traveller Dimensions). Maent am ddefnyddio’r ffilm i ddechrau newid agweddau ac edrych beth y gellir ei wneud yn lleol i sicrhau fod sipsiwn a theithwyr yn cael eu trin yn deg gyda’r un hawliau a pharch â phob aelod arall o’r gymuned. Mae’r ffilm eisoes wedi’i dangos yng Nghynulliad Cenedlaethol Cymru, yn Grwp Seneddol Hollbleidiol San Steffan ac mae wedi cael ei rhannu gan unigolion a rhwydweithiau cydraddoldeb ledled y DU ac Ewrop – cafwyd adborth gan bobl o bob cwr o’r byd. Mae Cadeirydd Cymdeithas Genedlaethol Swyddogion Heddlu Sipsiwn, Roma a Theithwyr wedi gofyn am gael ei defnyddio mewn hyfforddiant ffurfiol ar gyfer yr heddlu. Meddai’r grwp merched ‘Inspirational Traveller Dimension’: Roeddem am i bobl gael gwybod sut ydym yn teimlo pan fyddant yn dweud pethau hiliol wrthym ac yn ein trin yn wahanol i bobl eraill a rhoddodd y ffilm siawns i ni ddefnyddio ein lleisiau ein hunain drwy ein geiriau ein hunain.” Roeddem am ddangos i’r plant eraill sy’n mynd i’r ysgol gyda ni, y bobl sy’n byw yn ein cymunedau, yr heddlu, ein hathrawon, a phawb hyd at lefel y llywodraeth cymaint y mae troseddau casineb yn ein brifo, sut yr ydym yn teimlo a ble mae’n digwydd. Rydym am helpu i ganfod pam ei fod yn digwydd a rhoi terfyn arno a’r unig ffordd y gallwn wneud hynny yw trwy gael pobl i ddeall fod troseddau casineb yn digwydd mewn gwirionedd. Meddai’r Cynghorydd Billy Mullin, Aelod o’r Cabinet dros Reoli Corfforaethol: “Rwy’n falch iawn fod Llywodraeth Cymru wedi codi proffil y mater pwysig hwn. Rwy’n hyderus y gallwn wneud gwahaniaeth go iawn drwy weithio mewn partneriaeth. Y neges allweddol yw peidiwch â dioddef yn dawel. Os ydych yn gweld neu glywed rhywbeth, riportiwch o – mae pobl ar gael i helpu. Mae’r ffilm gan y prosiect Travelling Ahead yn tynnu sylw at effaith troseddau casineb ar ddioddefwyr ac rwy’n falch iawn fod y grwp ITD wedi cael cyfle i ddweud eu stori.” Dylid rhoi gwybod i Heddlu Gogledd Cymru am achosion o droseddau casineb ar 101 (999 mewn achosion brys) neu linell gymorth Cymorth i Ddioddefwyr sydd ar gael am ddim bob awr o’r dydd ar 0300 30 31 982 neu ar-lein ar wefan www.reporthate.victimsupport.org.uk