Newyddion Diweddaraf Cyngor Sir Y Fflint
Dydd Sadwrn Busnesau Bach
Published: 24/11/2014
Mae Cyngor Sir y Fflint yn cefnogi Dydd Sadwrn Busnesau Bach y DU, sef ymgyrch
genedlaethol i ddathlu ac annog pobl i siopa mewn siopau lleol annibynnol.
Anogir siopwyr yn Sir y Fflint i gefnogi eu trefi lleol cyn y Nadolig drwy
siopa’n lleol ddydd Sadwrn 6 Rhagfyr. Mae’r diwrnod yn cael ei alw’n ‘Ddydd
Sadwrn Busnesau Bach’ gan ymgyrch genedlaethol anwleidyddol, anfasnachol ar
lawr gwlad sy’n tynnu sylw at lwyddiannau busnesau bach ac sy’n annog siopwyr i
‘siopa’n lleol’ a chefnogi busnesau bach yn eu cymunedau.
Gall siopau a busnesau bach eraill lawrlwytho poster am ddim oddi ar wefan yr
ymgyrch i hyrwyddo’r diwrnod, a hefyd cael cyngor defnyddiol ynglyn â sut i
ddenu cwsmeriaid ar y diwrnod - https://smallbusinesssaturdayuk.com/.
Yn ogystal ag annog siopwyr i ddefnyddio eu siopau lleol ar ddydd Sadwrn
busnesau bach, mae masnachwyr eu hunain yn cael eu hannog hefyd i wneud y gorau
o’r diwrnod drwy gynnig gostyngiad, cynnig arbennig neu sampl am ddim i ddenu
pobl i mewn i siopa gyda nhw ar y diwrnod.
Meddai’r Cynghorydd Derek Butler, Aelod o’r Cabinet dros Ddatblygiad Economaidd:
Rydym yn hynod falch o gael cefnogi Dydd Sadwrn Busnesau Bach ar 6 Rhagfyr.
Mae gan sawl tref yn Sir y Fflint nifer o fasnachwyr diddorol ac unigryw sy’n
cynnig ystod dda o eitemau ar gyfer pobl sy’n siopa Nadolig a thrwy gydol y
flwyddyn. Mae cefnogi masnachwyr annibynnol lleol yn rhoi hwb i’r economi leol
ac yn helpu i greu swyddi lleol hefyd. Dangoswch eich cefnogaeth i’r siopau
a’r gwasanaethau hanfodol hyn yng nghanol eich trefi drwy siopa’n lleol a
chefnogi Dydd Sadwrn Busnesau Bach.”