Newyddion Diweddaraf Cyngor Sir Y Fflint

Mynediad haws at Iechyd a Gofal Cymdeithasol Cymunedol

Published: 11/12/2014

Mae gwasanaeth newydd yn cael ei lansio’r gwanwyn nesaf fydd yn ei gwneud hi’n haws i bobl dros 18 gael mynediad at iechyd a gofal cymdeithasol cymunedol yn Sir y Fflint. Mae Cyngor Sir y Fflint, Bwrdd Iechyd Prifysgol Betsi Cadwaladr a’r sector gwirfoddol wedi ymuno i ddarparu mynediad cysylltiedig at wasanaethau a gwybodaeth iechyd a gofal cymdeithasol cymunedol. Mi fydd modd i breswylwyr gysylltu drwy ddefnyddio un rhif ffôn i siarad ag aelod o dîm o staff iechyd a gofal cymdeithasol wedi’u cyd-leoli. Caiff adroddiad yn diweddaru cynghorwyr ar y fenter newydd ei gyflwyno i Gabinet y Cyngor ar Ddydd Mawrth 16 Rhagfyr. Enw’r fenter ydyr Un Pwynt Mynediad, mi fydd hi’n darparu llwybr integredig a syml at wasanaethau iechyd a gofal cymdeithasol cymunedol. Mi fydd hi hefyd yn darparu pobl broffesiynol â ffordd o rannu gwybodaeth a darparu gwasanaethau sydd wedi’u cydlynu’n well. Caiff anghenion y galwr eu hadnabod yn dilyn yr ymholiad cyntaf, yn gwneud yn siwr eu bod yn cael eu cyfeirio at wasanaethau eraill yn y gymuned leol neu’n cael eu cyfeirio at y gwasanaeth cywir. Mi fydd hi hefyd yn galluogi pobl i gael mynediad at yr ystod eang o gefnogaeth sydd ar gael yn eu cymunedau. Mi fydd hi’n un o chwech ar draws ardaloedd Cyngor Sir Gogledd Cymru ac maen cael ei hariannu’n rhanbarthol gan Gronfa Cydweithio Rhanbarthol Llywodraeth Cymru. Dywedodd y Cynghorydd Christine Jones, Aelod Cabinet y Gwasanaethau Cymdeithasol: “Mi fydd y ffordd newydd yma o weithio’n golygu bod defnyddwyr ein gwasanaethau’n gallu cysylltu ag un rhif yn hytrach na nifer o sefydliadau sy’n gallu drysu a chymryd amser. Rydw i’n falch ein bod ni’n mynd i allu cynnig gwasanaeth di-dor i bobl, yn gweithio gyda’n partneriaid yn y sectorau gwirfoddol ac iechyd i sicrhau bod pobl yn cael y wybodaeth gywir o’r gwasanaeth cywir ar yr amser cywir.”