Newyddion Diweddaraf Cyngor Sir Y Fflint
Polisi Goleuadau Stryd
Published: 17/04/2015
Yn ei gyfarfod ddydd Mawrth (21 Ebrill), bydd y Cabinet yn trafod polisi
goleuadau stryd newydd. Nod y polisi yw darparu gwasanaeth effeithiol ac
effeithlon, a lleihau ôl-troed carbon y Cyngor.
Mae Cyngor Sir y Fflint yn berchen ar dros 20,000 o oleuadau stryd a 3,250 o
arwyddion wedi’u goleuo ledled y Sir, a’r Cyngor sy’n gyfrifol am eu cynnal a’u
cadw. Mae hefyd yn cynnal a chadw goleuadau cefnffyrdd ar ran Llywodraeth
Cymru.
Ar hyn o bryd, mae’r trydan a ddefnyddir i redeg yr holl unedau hyn yn costio
tua £864,000 y flwyddyn.
Oherwydd datblygiadau technolegol newydd yn y diwydiant, mae’n awr yn bosibl
newid sut y caiff goleuadau stryd eu rheoli. Mae’r datblygiadau hyn yn
helpu’r Cyngor i gyflawni ei nod a’i ymrwymiad i ddefnyddio llai o ynni ac i
leihau ei ôl-troed carbon. Mae’r rhain yn cynnwys gosod cyfarpar arbed ynni ac
unedau goleuadau rhad-ar-ynni bob tro y bydd angen newid hen unedau.
Datblygwyd y polisi newydd ar ôl ymgynghori â chynghorwyr sir, tref a chymuned.
Bydd yn ymestyn y cynllun i oleuo rhai strydoedd am ran o’r nos. Bwriedir
diffodd y goleuadau stryd mewn rhai ardaloedd penodol rhwng hanner nos a 5am.
Bydd yr amser safonol i ymateb i geisiadau i drwsio goleuadau stryd yn newid i
10 diwrnod gwaith. Os penderfynwyd, ar ôl cynnal asesiad risg, bod angen goleuo
lleoliad yn well er diogelwch, (ee tai cysgodol, CCTV a safleoedd hanfodol
eraill) caiff y lleoliad hwnnw ei eithrio a bydd y cyfnod ymateb safonol yn
parhau, sef tri diwrnod gwaith.
Bydd y Cyngor hefyd yn lleihau’r drefn archwilio gyda’r nos. Ar hyn o bryd
mae’n cynnal archwiliadau fin nos bob 14 noson i weld lle mae’r diffygion ond
bydd hyn yn ymestyn i 28 diwrnod.
Yn ogystal â sicrhau arbedion drwy ddefnyddio ynni’n fwy effeithlon a lleihau
carbon, disgwylir i’r mesurau hyn arbed £50,000 y flwyddyn pan gânt eu rhoi ar
waith.
Dywedodd y Cynghorydd Bernie Attridge, y Dirprwy Arweinydd a’r Aelod Cabinet
dros yr Amgylchedd:
“Nod cyffredinol polisi goleuadau stryd y Cyngor yw rheoli a sicrhau rhwydwaith
goleuadau stryd diogel ac effeithlon sy’n sicrhau diogelwch pawb – helpu i
wella ymddygiad gyrwyr, lleihau trosedd a chreu cymunedau mwy diogel.
“Cytunwyd ar gynlluniau i leihau adnoddau goleuadau stryd a chyflwyno cynllun i
oleuo strydoedd am ran o’r nos fel rhan o gynigion y gyllideb, i’n helpu ni i
arbed arian. Rydym yn ddiolchgar i’r cynghorwyr, sir, tref a chymuned a ddaeth
i’r gweithdai ac a roddodd sylwadau ar y newidiadau hyn; maent wedi’u cynnwys
yn y polisi newydd.”