Newyddion Diweddaraf Cyngor Sir Y Fflint

Cyflwyno Medal yr Ymerodraeth Brydeinig i Mrs Edwards

Published: 08/04/2014

Mae Arglwydd Raglaw Clwyd wedi cyflwyno Medal yr Ymerodraeth Brydeinig (BEM) i wraig leol sydd wedi bod yn gwneud gwaith gwirfoddol ers dros 20 mlynedd. Derbyniodd Mrs Joan Edwards o Gorwen, sy’n athrawes wedi ymddeol, ei medal mewn seremoni yr wythnos ddiwethaf am wasanaethau gwirfoddol ac elusennol fel aelod o Wasanaeth Brenhinol Gwirfoddol y Merched ac fel arweinydd Clwb y Berwyn ers iddi ymddeol yn 1995. Cafodd y clwb, a oedd yn sefydliad i rai droi 60 oed yn wreiddiol, ei ail-enwi ac mae ganddo bellach aelodau o oedrannau amrywiol o 55 oed i dros 90 oed. Mae Mrs Edwards wedi rhoi llawer iawn o’i hamser a’i hegni i mewn i redeg y clwb ers iddi gymryd yr awenau ac mae wedi cynnal cyfarfod bob pythefnos am baned a sgwrs i’r aelodau mewn clwb sy’n cynnig amrywiaeth mawr o weithgareddau. Maent yn cael amryw o siaradwyr, arddangosiadau o bob math, sgyrsiau addysgol o ganghenau o wahanol wasanaethau, sesiynau crefft, cwisiau, dosbarthiadau ymarfer corff a dawnsio hawdd. Mae nifer yr aelodau wedi treblu o ganlyniad i’w gwaith gyda’r clwb ac mae wedi denu aelodau o bentrefi cyfagos cymaint nes bo’r nifer wedi gorfod cael ei gyfyngu oherwydd maint y lleoliad, sef Canolfan Byw’n Iach Corwen, ac mae rhestr aros o bobl sy’n dymuno ymuno. Fel ymddiriedolwr Partneriaeth Gymunedol De Sir Ddinbych mae hi wedi darparu cyngor amhrisiadwy er mwyn cynnal y Ganolfan Byw’n Iach ac wedi treulio llawer o amser yn ymchwilio i mewn i grantiau i gadw’r ganolfan a’r clwb mewn sefyllfa ariannol iach. Drwy sicrhau grant gwerth £5,000 gan y Gronfa Loteri Fawr yn 2012 llwyddodd yr aelodau i ymweld â lleoedd o ddiddordeb hanesyddol ac mae wedi llwyddo i gael mynediad at gyllid allanol i’r clwb o amryw o ffynonellau. Llun: Uwch Siryf Clwyd, Celia Jenkins, Mrs Joan Edwards BEM ac Arglwydd Raglaw Clwyd Harry Fetherstonhaugh. MEC_4411 copy.jpg