Newyddion Diweddaraf Cyngor Sir Y Fflint
Rhaglenni Gwella Priffyrdd
Published: 19/05/2014
Bydd Cyngor Sir y Fflint yn dechrau gwaith ar raglen trin wyneb priffyrdd ym
mis Mehefin a fydd yn helpu i wella cyflwr ffyrdd gwledig y Sir. Bydd y rhaglen
gwerth £500,000 yn gweld bron 20 o ffyrdd gwledig neu rannau o ffyrdd yn cael
eu gwella ar draws Sir y Fflint.
Yn ogystal, bydd rhaglen gwerth £250,000 o drwsio lonydd cerbydau sy’n gwneud
atgyweiriadau parhaol i’r ffyrdd hynny nad oes angen triniaeth ailwynebu llawn
yn dechrau ym mis Mehefin hefyd.
Mae’r ddwy gontract yma’n cael eu hariannu o gyllideb cynnal priffyrdd y Cyngor
a gyda’i gilydd maent yn dod â chyfanswm y buddsoddiad yn y rhwydwaith ffyrdd
lleol yn y flwyddyn ariannol gyfredol i dros £2.5m.
Mae pob un o’r ffyrdd yn y Sir wedi’u harchwilio i asesu eu cyflwr yn dilyn
misoedd y gaeaf gan staff o’r Gwasanaethau Stryd. Mae’r archwiliadau hyn wedi
sicrhau bod y ffyrdd sydd ag angen eu hatgyweirio fwyaf yn derbyn y sylw sydd
ei angen arnynt.
Fel ag yn y blynyddoedd blaenorol, bydd angen gorchmynion cau ffyrdd a
gwyriadau dros dro, yn ystod cyfnod y gwaith, er mwyn diogelwch y contractwyr
sy’n gwneud y gwaith yn ogystal â defnyddwyr y ffyrdd. Bydd arwyddion ymlaen
llaw yn cael eu gosod wrth bob lleoliad, yn rhoi gwybod i bobl pryd y mae’r
gwaith i fod i ddechrau a byddai’r Cyngor yn gwerthfawrogi amynedd y cyhoedd
sy’n teithio a phreswylwyr lleol yn ystod cyfnod y gwaith.
Bydd manylion rhaglen trin yr wyneb a’r rhaglen drwsio ar gael ar wefan y
Cyngor yn ddiweddarach yr wythnos hon.
Meddai’r Cynghorydd Bernie Attridge, Dirprwy Arweinydd ac Aelod y Cabinet dros
yr Amgylchedd: “Dyma’r ail gyhoeddiad pwysig ynghylch buddsoddiad yn ffyrdd y
Sir yn yr ychydig wythnosau diwethaf ac eto mae’n pwysleisio pwysigrwydd
rhwydwaith priffyrdd wedi’i gynnal yn dda i Gyngor Sir y Fflint.’’