Newyddion Diweddaraf Cyngor Sir Y Fflint
Cwrdd âr Her Ariannol yn Sir y Fflint
Published: 12/11/2015
Mae hyd at 300 o bobl eisoes wedi cofrestru hyd yma i fynd i gyfres o
ddigwyddiadau ymgysylltu â’r cyhoedd i glywed am yr her ariannol sy’n wynebu
Cyngor Sir y Fflint.
Mae gwasanaethau lleol a chyfleusterau cymunedol dan fygythiad oherwydd y
gostyngiadau mawr mewn gwariant cyhoeddus, ac mae Cyngor Sir y Fflint yn galw
ar y cyhoedd i sefyll o blaid eu gwasanaethau lleol.
Mae’r cyfarfodydd ymgysylltu yn dechrau nos Llun, 16 Tachwedd a byddant yn
gyfle i bobl glywed sut y gallant gymryd rhan yn y gwaith o lywio gwasanaethau
at y dyfodol a sicrhau bod ganddynt lais yn y trafodaethau ariannol. Gall pobl
gofrestru i fod yn bresennol mewn un o saith o gyfarfodydd ar hyd a lled y sir.
Bydd y rhai sy’n dod i’r cyfarfodydd yn clywed am y modd y mae’r cyngor yn mynd
i’r afael â’r her ariannol sy’n ei wynebu a sut y gall cymunedau lleol gymryd
rhan. Bydd ffilm wedi’i hanimeiddio’n dangos y bwlch ariannu a chaiff pleidlais
ryngweithiol ei chynnal i gael barn pobl am nifer o faterion.
Mae angen i’r Cyngor ostwng ei gyllideb yn sylweddol a newid y ffordd y
darperir gwasanaethau a hynny oherwydd y gostyngiadau sylweddol yn y cyllid a
geir gan y llywodraeth o’r naill flwyddyn i’r llall.
Daw hyn ar adeg pan mae’r Cyngor yn wynebu cynnydd anochel mewn costau ac yn y
galw am wasanaethau. Mae Sir y Fflint yn Gyngor effeithlon ac arloesol ac, yn
y gorffennol, mae wedi dangos y gall ymdopi â’r cyllid sydd ar gael iddo.
Cafodd dros £22m ei arbed yn ystod y tair blynedd diwethaf. Er hynny, mae wedi
llwyddo i ddiogelu gwasanaethau allweddol fel cynnal a chadw ffyrdd, cadw
cymunedau’n lân ac yn daclus, canolfannau hamdden, ysgolion lleol, cymorth lles
a gwasanaethau i bobl hyn, plant sy’n agored i niwed ac sydd ag anableddau.
Ond o hyn tan 2018 mae’r rhagolygon yn llwm gan fod y Cyngor wynebu bwlch
ychwanegol o £53m yn ei gyllideb. Llwyddwyd i arbed £18.3m yn barod eleni fel
rhan o’r targed hwn, ac rydym bellach wedi cyrraedd ‘trobwynt’ difrifol.
Mae’r Cyngor wedi cyhoeddi Strategaeth Ariannol Tymor Canolig fanwl sy’n
nodi sut y mae’n bwriadu ymateb i’r heriau sy’n ei wynebu. Bydd angen
cymorth Llywodraeth Cymru a’r cyhoedd i gyflawni hynny.
Meddai Arweinydd y Cyngor Aaron Shotton: “Rydym yn cael llai o gyllid na’r rhan
fwyaf o gynghorau Cymru ac nid yw’r Dreth Gyngor rydym yn ei godi’n ddim uwch
na’r cyfartaledd, ond gan ein bod yn cael cyn lleied o gyllid, ac yn wynebu
toriadau parhaus oherwydd rhaglen gyni barhaus Llywodraeth y DU, rydym yn
wynebu gostyngiadau sylweddol yn ein cyllideb. Mae’n galonogol fod hyd at 300
o bobl hyd yma wedi dangos diddordeb mewn cymryd rhan yn y drafodaeth.
Ychwanegodd y Prif Weithredwr, Colin Everett: Dyma gyfle’r cyhoedd i
gymryd rhan. Rydym eisoes yn cynorthwyo pobl leol ac yn cydweithio â nhw i
ddatblygu ffyrdd newydd o ddarparu gwasanaethau’n lleol, ac mae’r ymateb hyd
yma wedi bod yn galonogol.”
Gall pobl gofrestru i fynd i un o saith cyfarfod ymgysylltu â’r
cyhoedd mewn lleoliadau ar hyd a lled y Sir gan ddechrau ar 16 Tachwedd.
Bydd angen i bobl gofrestru’n awr gan na chaniateir mwy na 200 ym mhob
lleoliad. Gallant wneud hyn drwy fynd ar-lein ar
www.siryfflint.gov.uk/EinCyfleNi neu drwy ffonio’r llinell gofrestru arbennig
ar 01352 701701 rhwng 9am a 5pm, o ddydd Llun i ddydd
Mercher.
Bydd y digwyddiadau’n cael eu cynnal rhwng 6.30pm a 8.30pm yn y lleoliadau
a ganlyn:
Nos Lun, 16 Tachwedd: Ysgol Uwchradd Elfed, Bwcle
Nos Fawrth, 17 Tachwedd: Ysgol Gwynedd, Y Fflint
Nos Fercher, 18 Tachwedd: Ysgol Uwchradd Treffynnon
Nos Lun, 23 Tachwedd: Ysgol Bryn Coch,Yr Wyddgrug
Nos Fawrth, 24 Tachwedd: Ysgol Gynradd Brychdyn
Nos Iau,3 Rhagfyr: Neuadd Ddinesig, Cei Connah
Nos Lun, 7 Rhagfyr: Ysgol Gynradd Sandycroft