Newyddion Diweddaraf Cyngor Sir Y Fflint

Gostyngiad mewn ardrethi busnes i fanwerthwyr

Published: 16/06/2014

Disgwylir i’r Cabinet gymeradwyo cynllun gostwng ardrethi busnes newydd i fanwerthwyr Sir y Fflint mewn cyfarfod ddydd Mawrth (17 Mehefin). Amcangyfrifir y bydd 725 o fusnesau’n elwa o grantiau hyd at £1,000 a gynigir i fusnesau mewn adeiladau manwerthu a feddiennir sydd â gwerth ardrethol o £50,000 neu lai. Mae Llywodraeth Cymru wedi cadarnhau bellach fod dros £580,000 o gyllid ar gael i Gyngor Sir y Fflint i ddiwallu anghenion siopau, bwytai, caffis ac adeiladau trwyddedig lleol. Bydd y grantiau’n cael eu gweithredu yn y biliau net ar ôl i bob gostyngiad arall, gan gynnwys y gostyngiad ardrethi busnesau bach, gael eu tynnu. Cesglir ardrethi busnes gan y Cyngor ar ran Llywodraeth Cymru. Meddai’r Cynghorydd Billy Mullin, Aelod o’r Cabinet dros Reoli Corfforaethol: “Mae Cyngor Sir y Fflint yn gweithio mewn partneriaeth â Llywodraeth Cymru i gynnig yr arbedion hyn i fusnesau lleol. Gobeithiaf y bydd busnesau a gwasanaethau’n achub ar y cyfle i ddefnyddio’r gostyngiadau hyn mewn ardrethi a dylai roi hwb i’r economi leol.” Os ydych yn berchen ar fusnes lleol cysylltwch â’r Cyngor am fwy o wybodaeth ar www.siryfflint.gov.uk