Alert Section

Newyddion Diweddaraf Cyngor Sir Y Fflint


Canol Tref Treffynnon ar fin cael ei ailwampio

Published: 19/06/2014

Fe fydd tref Treffynnon yn cael ei thrawsnewid dros y misoedd nesaf wrth i waith gychwyn ar adfywio canol y dref. Yn dilyn cyfnod o ymgynghori gyda Chyngor Tref Treffynnon, Partneriaeth Tref Treffynnon a’r cyhoedd, bydd y cyfnod cyntaf o waith adeiladu yn cychwyn fis Gorffennaf a bydd yn para am tua thri mis. Mae gwahoddiad i breswylwyr a pherchnogion busnes lleol gwrdd â staff o Gyngor Sir y Fflint a chontractwr y gwaith (GH James), er mwyn iddynt weld y cynlluniau. Bydd staff ar gael yn Sir y Fflint yn Cysylltu, Stryd Fawr Treffynnon, ddydd Mawrth 1 Gorffennaf rhwng 3.30pm a 6.30pm, er mwyn trafod unrhyw bryderon sydd ganddynt cyn i’r gwaith gychwyn. Mae’r cynlluniau’n cynnwys: gwelliannau i brif fynedfeydd i ganol y dref gan greu mynedfa o nodwedd ar Stryd Chwitffordd; mynedfa ddeniadol yn seiliedig ar risiau sy’n arwain i’r dref o Stryd y Ffynnon; tacluso’r Stryd Fawr yn gyffredinol a gosod plinth nodedig ar gyfer y cerflun newydd yng nghanol y dref. Yn rhan o fenter twristiaeth newydd gan y Cyngor Sir er mwyn annog trefnwyr teithiau i grwpiau i gynnwys Sir y Fflint fel cyrchfan ar gyfer grwpiau sy’n teithio, bydd parth penodol i fysiau gael gollwng teithwyr yn cael ei ddatblygu ar waelod Tower Gardens. Dyma oedd gan y Cynghorydd Derek Butler, Aelod Cabinet dros Ddatblygu Economaidd i’w ddweud: “Bydd y gwelliannau yma i adeiladwaith Canol Tref Treffynnon yn cyd-fynd â gweithgareddau eraill sy’n digwydd, gan roi balchder i breswylwyr lleol ac annog rhagor o ymwelwyr i’r ardal.” Mae Cyngor Sir y Fflint wedi derbyn cyllid ar gyfer strydlun a gwelliannau mynediad gan Gronfa Ddatblygu Rhanbarthol Ewrop a Chynllun Datblygu Gwledig ar gyfer Cymru 2007-2013, sydd yn eu tro yn cael eu hariannu gan Lywodraeth Cymru a’r Gronfa Ewropeaidd dros Ddatblygu Gwledig. Capsiynau llun: Canol Tref Treffynnon cyn yr ailwampiad.