Newyddion Diweddaraf Cyngor Sir Y Fflint
Archwiliwch droedfryniau Gogledd Cymru
Published: 15/02/2017
Mae Llwybr Cyswllt Cymru newydd ag arwyddion ar ei hyd ac yn barod i’w
archwilio!
Yn ymestyn dros ddeunaw milltir ac yn mynd trwy bedair sir, mae Llwybr Cyswllt
Cymru bellach yn cysylltu â Llwybr Arfordir Cymru trwy ochr ddeheuol Pont Droed
Saltney Ferry gan fynd trwy Saltney, Bretton, Dodleston, Burton Meadows,
Honkley, Shordley Hall, Caer Estyn, Caergwrle, Cymau, Ffrith, Four Crosses ac
yn olaf ymuno â llwybr Clawdd Offa ar hyd Llwybr y Gweundir yng Nghoed
Llandegla.
Beth am gadw’r adduned Blwyddyn Newydd yna a chwilio am eich esgidiau cerdded a
threulio diwrnod hamddenol yn cerdded o Saltney i Gaergwrle? Wedyn gallwch
ymweld â Chastell Caergwrle, cyn cael tamaid o fwyd ac yna dal y trên neu fws
yn ôl i Gaer.
Neu fe alwch gerdded o Gaergwrle i Glawdd Offa yn Llandegla, gan fwynhau’r
golygfeydd godidog or rhostiroedd uchel. Yna cerdded ar hyd llwybr Clawdd
Offa i bentref Llandegla lle medrwch ddal y bws yn ôl i Gaergwrle.
Os ydych awydd cerdded y llwybr dros gwpl o ddiwrnodau, gallwch aros yn Hope
Mountain Bed and Breakfast yng Nghymau, neu wersylla go wahanol yn Bryn Dwr
Pods, Llandegla, mae’r ddau ddim ond tafliad carreg o Lwybr Cyswllt Cymru.
Dywedodd y Cynghorydd Bernie Attridge, Aelod Cabinet yr Amgylchedd a Dirprwy
Arweinydd Cyngor Sir y Fflint:
“Mae Llwybr Cyswllt Cymru yn gysylltiad hynod bwysig rhwng dau lwybr pwysig
presennol yng Ngogledd Cymru. Bydd yn denu cerddwyr o bob cwr, a fydd yn
mwynhau gogoniant Gogledd Cymru, tra hefyd yn rhoi hwb i dwristiaeth leol.
“Os ydych yn chwilio am dipyn mwy o her wrth gerdded o amgylch Cymru, dyma’r
llwybr i chi. Mae agor y llwybr hwn yn dod â Sir y Fflint a rhan olaf arfordir
Cymru yn brofiad “Cymru gyfan”.
Dywedodd Ceidwad Cefn Gwlad Sir y Fflint, Stephen Lewis:
“Rwyf wir wedi mwynhau cyflawnir prosiect hwn, gan ddefnyddio £30,000 o’r
cymorth grant Cronfa Cymunedau’r Arfordir, ac mae wedi bod yn bleser cydweithio
gydar Swyddogion Hawliau Tramwy o Gynghorau Sir y Fflint, Caer, Wrecsam a Sir
Ddinbych. Mae hefyd wedi bod yn wych gweithio gyda gwirfoddolwyr, sydd yn eu
tro wedi bod yn amhrisiadwy. Mae’r gwaith a wnaed wedi uwchraddio’r hawliau
tramwy presennol, gan wneud y llwybr hwn yn daith sydd wir i’w mwynhau.”
Mae Cronfa Cymunedaur Arfordir yn cael ei gyllido gan y Llywodraeth gydag
incwm o asedau morol Ystâd Y Goron. Caiff ei ddarparu gan Gronfa’r Loteri Fawr
ar ran Llywodraeth y DU ar Gweinyddiaethau Datganoledig yng Ngogledd Iwerddon,
yr Alban a Chymru.
Cadwch lygad am logo unigryw Llwybr Cyswllt Cymru!
Mae mapiau o’r llwybr ar gael oddi wrth:
https://fccmapping.flintshire.gov.uk/connect/analyst/?mapcfg=waleslinkpath
Mae amseroedd bysus a threnau ar gael oddi wrth:
www.arrivabus.co.uk/wales www.arrivatrainswales.co.uk