Flintshire families get hands-on at key artificial intelligence workshops

Mae rhieni, disgyblion ac athrawon ym mhob rhan o Sir y Fflint yn dysgu am y datblygiadau diweddaraf ym maes deallusrwydd artiffisial (AI) gyda chymorth cwmni addysgol o’r Wyddgrug. 

Fel rhan o raglen ‘Cryfder mewn Rhifau’ Cyngor Sir y Fflint, a gefnogir gan Gronfa Ffyniant Gyffredin y Deyrnas Unedig (UKSPF), daeth mwy na 100 o bobl i’r gweithdai hwyliog, a drefnwyd gan fusnes teuluol o’r enw Sniff and Snails.

Roedd y gwersi’n defnyddio rheolydd Crumble a ddyfeisiwyd gan y cwmni – sef cyfrifiadur bach y gellir ei raglennu i gwblhau tasgau trwy ddefnyddio cyfarwyddiadau i reoli goleuadau, olwynion, moduron a synwyryddion. Mae’r broses hon yn dysgu sgiliau codio i bawb sy’n cymryd rhan.

Roedd yr ymateb yn wych, gyda 98% yn dweud ei fod wedi eu gwneud yn fwy hyderus wrth ddefnyddio AI – enghraifft arall o lwyddiant y rhaglen ‘Cryfder mewn Rhifau’ i wella llythrennedd, Saesneg ar gyfer Siaradwyr Ieithoedd Eraill (ESOL), rhifedd, sgiliau digidol a sgiliau eraill ar draws y sir.  

Cynhaliwyd y gweithdai ar gyfer dysgwyr cyfnod allweddol dau a’u rhieni mewn nifer o ysgolion Sir y Fflint, yn cynnwys Ysgol Derwenfa, Coedllai; Ysgol Gynradd Sirol Gwepra, Cei Connah; Ysgol Parc Cornist, Y Fflint; Ysgol Gynradd Gatholig Santes Fair, Y Fflint; Ysgol Trelawnyd VA a Chaffi Isa ym Mynydd Isa ger Yr Wyddgrug. 

Gyda deallusrwydd artiffisial yn cyfrannu tua £3.7 biliwn i economi’r Deyrnas Unedig, mae sefydlydd Sniff and Snails, Hayley Laidlaw-Wilson, o’r farn fod y gweithdai hyn yn ffordd ardderchog o roi gwell dealltwriaeth i drigolion Sir y Fflint o’r modd y mae AI yn gweithio.s. 

Meddai: “Mae ein rheolydd Crumble eisoes yn cael ei ddefnyddio mewn mwy na 14,000 o ysgolion yn y Deyrnas Unedig ac felly roedd yn braf ei weld ar waith yn Sir y Fflint yn cefnogi ac ysbrydoli technolegwyr y dyfodol.

“Roeddem yn arbennig o falch o glywed sut y gwnaeth y sesiynau hyn gynyddu hyder a gallu wrth drin y dechnoleg AI. Gobeithio y bydd y rhai a gymrodd ran yn parhau archwilio posibiliadau trawsnewidiol deallusrwydd artiffisial.” 

Yn dilyn y gweithdai hyn hefyd, mae Sniff and Snails wedi defnyddio cefnogaeth UKSPF i’r cynllun Cryfder mewn Rhifau i greu hyb addysgu a’r llyfrgell offer ar gyfer ysgolion Sir y Fflint.

Oddi yno, gall athrawon fenthyg citiau dysgu pynciau STEM (gwyddoniaeth, technoleg peirianneg a mathemateg) a ddatblygwyd gan y busnes. Maent ar gael yn rhad ac am ddim, ynghyd â chynlluniau gwersi sy’n cynnwys codau traws gwricwlaidd.

Ychwanegodd Hayley: “Heb gefnogaeth UKSPF, byddem wedi gorfod chwilio am gefnogaeth ariannol yn rhywle arall i sefydlu’r hyb addysgu a llyfrgell citiau. Diolch yn fawr iawn am y gefnogaeth.
“Gyda 12 ysgol eisoes wedi arwyddo i fenthyg ein citiau, edrychwn ymlaen at weld eu dylanwad. Gobeithio y bydd rhagor o ddarparwyr addysg yn dilyn eu hesiampl.”

Mae Suzanne Wrench a Daisy Wrench, 10, yn cael llawer o hwyl yn adeiladu eu robot gyda’i gilydd yn ystod gweithdy yn Ysgol Bryn Garth, Penyffordd ger Treffynnon.

Meddai cydlynydd y prosiect ‘Cryfder mewn Rhifau’, Claire Worrall: “Rydym wrth ein bodd ynglŷn â’r ffordd y mae ein partner, Sniff and Snails, wedi helpu i wella sgiliau digidol ym mhob rhan o Sir y Fflint yn eu gweithdai creadigol.  

“A thrwy greu hyb addysgu ar lein a llyfrgell citiau, crëwyd dilyniant amlwg trwy alluogi athrawon i barhau i gefnogi eu gwaith yn y dosbarth gyda chymorth technoleg arloesol a chynlluniau gwersi cynhwysfawr.”

Meddai’r Cynghorydd Chris Dolphin, aelod cabinet Cyngor Sir y Fflint dros yr amgylchedd, adfywio, cefn gwlad a thwristiaeth: “Mae gwella dealltwriaeth a meithrin hyder ymhlith trigolion Sir y Fflint yn rhan allweddol o sicrhau fod pobl ifanc, athrawon a rhieni yn cael y budd mwyaf o ddefnyddio deallusrwydd artiffisial, yn arbennig gan fod AI yn faes sy’n datblygu mor gyflym.

Derbyniodd y rhaglen ‘Cryfder mewn Rhifau’ bron i £210,000 o gyfran Cyngor Sir y Fflint o Gronfa Ffyniant Gyffredin Llywodraeth y Deyrnas Unedig (UKSPF) am flwyddyn barhad 2025/26.