Pwy Ydym Ni

Mae Gwasanaeth Ieuenctid Sir y Fflint yn rhan o bortffolio Addysg ac Ieuenctid Cyngor Sir y Fflint. Rydym yn gweithio â phobl ifanc rhwng 11 a 25 oed i gefnogi eu datblygiad personol, cymdeithasol ac addysgol, yn ogystal â’u hiechyd meddwl a’u lles. 

Darparwn amrywiaeth helaeth o gyfleoedd a phrofiadau yn Gymraeg a Saesneg, gan sicrhau fod darpariaeth gynhwysol a difyr ar gael i bobl ifanc. Drwy ddulliau gwaith ieuenctid, rydym yn creu profiadau difyr sy’n cyfoethogi bywydau pobl ifanc ac yn hybu eu twf.

Ein Ffordd o Weithio

Mae ein gwaith yn seiliedig ar bum piler gwaith ieuenctid:

• Mae pobl ifanc yn ffynnu
• Mae gwaith ieuenctid yn hygyrch ac yn gynhwysol
• Cefnogir staff gwaith ieuenctid gwirfoddol a staff proffesiynol cyflogedig gydol eu gyrfaoedd i wella eu hymarfer
• Mae gwaith ieuenctid yn cael ei werthfawrogi a’i ddeall
• Dull cynaliadwy o ddarparu gwaith ieuenctid

Yr Hyn a Wnawn

Mae Gwasanaethau Ieuenctid Sir y Fflint yn darparu amrywiaeth helaeth o gyfleoedd i bobl ifanc mewn gwahanol leoliadau.

Rydym yn cynnal wyth o glybiau ieuenctid wythnosol yn ystor tymhorau ysgol. Sesiynau agored yw’r rhain sy’n cynnig lle diogel i bobl ifanc rhwng 11 a 17 oed gymdeithasu, meithrin cyfeillgarwch a chymryd rhan mewn gweithgareddau llesol.

Mae’r Tîm Gwaith Datgysylltiedig ac Allgymorth yn gweithio mewn cymunedau lleol yn ystod tymhorau ysgol ac ar hyn o bryd yn cynnal sesiynau ar y cyd â Gwella i feithrin cyswllt â phobl ifanc ble bynnag y maen nhw.

Mae’r Gwasanaeth Atal Digartrefedd Ieuenctid yn cefnogi pobl ifanc y mae angen cymorth ychwanegol arnynt. Mae’r tîm yn gweithio i atal digartrefedd ac argyfyngau drwy gynnig gwasanaeth cyfryngu i deuluoedd, cymorth i gael addysg a gwaith a chyngor ynglŷn â datblygu sgiliau byw’n annibynnol.

Mae’r tîm Trochi yn yr Ysgol a’r Gymuned yn gweithio yn ysgolion uwchradd Sir y Fflint i gefnogi pobl ifanc yn ystod y diwrnod ysgol a’u helpu i gyflawni eu nodau a’u dyheadau.

Mae’r Ysgol Goedwig yn cynnig cyfleoedd i ddysgu yn yr awyr agored ac yn galluogi pobl ifanc i fagu sgiliau newydd wrth gysylltu â byd natur.

Mae’r Tîm Datblygu Chwarae’n cynnal sesiynau chwarae dan oruchwyliaeth sy’n agored i bawb mewn cymunedau lleol, sy’n hybu lles a datblygiad plant a phobl ifanc.

Cliciwch ar y tab Darpariaethau’r Gwasanaethau Ieuenctid i weld y sesiynau / prosiectau eraill sydd ar waith:

Ymrwymiad at y Gymraeg

Mae Gwasanaeth Ieuenctid Sir y Fflint yn cydnabod mor bwysig yw hyrwyddo ac eirioli dros y Gymraeg a’i gyfrifoldeb i wneud hynny. Rydym yn cyflogi Swyddog Iaith Gymraeg Cymunedol sy’n cydweithio â’n holl wasanaethau i sicrhau fod y Gymraeg wedi’i gwreiddio yn y ddarpariaeth.

Mae hynny’n cyfrannu at gyflawni targed Llywodraeth Cymru o gael miliwn o siaradwyr Cymraeg erbyn 2050 ac yn sicrhau y caiff pobl ifanc gyfleoedd i arfer eu sgiliau Cymraeg a’u datblygu mewn ffyrdd ystyrlon.

Lle Ydym Ni

Rydym yn gweithio â phobl ifanc mewn amryw leoedd er mwyn sicrhau bod ein gwasanaethau’n hygyrch ac yn bodloni eu hanghenion. Mae hynny’n cynnwys canolfannau ieuenctid, clybiau ieuenctid, ysgolion, cymunedau lleol a thrwy waith ieuenctid datgysylltiedig – cwrdd â phobl ifanc ble bynnag y maen nhw.

Rydym hefyd yn meithrin cyswllt â phobl ifanc ar-lein drwy ein sianeli cyfryngau cymdeithasol. Dilynwch ni ar Facebook ac Instagram i gael y wybodaeth ddiweddaraf am weithgareddau, cyfleoedd a’r gefnogaeth sydd ar gael.

Cael Cymorth

Os oes arnoch angen cymorth ar frys, mae’r gwasanaethau isod yn darparu cymorth a chyngor yn gyfrinachol:

• Byw Heb Ofn
  Cymorth a chyngor ynglŷn â thrais yn erbyn merched, cam-drin domestig a thrais rhywiol.
  0808 80 10 800 (24 awr y dydd, 7 niwrnod yr wythnos)
• Meic
  Llinell gymorth i blant a phobl ifanc o dan 25 oed yng Nghymru.
  0808 80 23456 (8am–hanner nos, 7 niwrnod yr wythnos)
  Testun: 84001 neu wasanaeth sgwrsio ar-lein
• Childline
  Cymorth gydag amrywiaeth o bethau sy’n effeithio ar bobl ifanc, yn rhad ac am ddim ac yn gyfrinachol.
  0800 1111 neu siarad â chwnselydd ar-lein