Newyddion Diweddaraf Cyngor Sir Y Fflint

Sir y Fflint yn barod ar gyfer y gaeaf wrth i’r lorïau graeanu newydd fynd ar y ffordd

Published: 09/11/2026

Mae pedair lori graeanu newydd wedi ymuno â fflyd Cyngor Sir y Fflint wrth i’r timoedd baratoi i gadw’r sir i symud yn ddiogel trwy’r misoedd oer o’n blaenau.

Mae’r cerbydau amnewid yn dod wrth i’r Cyngor baratoi ar gyfer gaeaf arall o waith cynnal a chadw ddydd a nos i gadw’r priffyrdd ac ardaloedd cyhoeddus eraill yn ddiogel a hygyrch pan fydd y tymereddau rhewllyd yn cyrraedd.

Bob gaeaf, mae’r Cyngor yn monitro amodau’n ddyddiol er mwyn gwneud penderfyniadau o ran pryd i raeanu. Gall y lorïau graeanu fod ar waith 24 awr y dydd, saith diwrnod yr wythnos os fydd hynny’n ofynnol yn sgil yr amodau. Mae'r tymor yn rhedeg o 1 Hydref i 30 Ebrill bob blwyddyn.

Mae llwybrau blaenoriaeth ar gyfer graeanu yn Sir y Fflint yn cynnwys oddeutu 560 cilomedr o ffordd - gan gynrychioli 45% o rwydwaith priffordd y sir, gan gynnwys llwybrau allweddol sy’n cysylltu cymunedau a darparu mynediad at wasanaethau hanfodol.

Mae’r Cyngor yn gweithredu fflyd o 12 lori graeanu a dau gerbyd wrth gefn, a all gael eu llwytho a bod yn barod i fynd o fewn 90 munud o gael cyfarwyddyd. Gellir hefyd gosod aradr eira arnynt yn ystod cyfnodau o eira trwm, ac fe gânt eu cefnogi gan gontractwyr amaethyddol lleol ar lwybrau clirio eira dynodedig.

Unwaith bydd y rhwydwaith blaenoriaeth wedi ei raeanu, bydd ffyrdd eraill ac ardaloedd cerdded allweddol hefyd yn cael eu trin pan fydd hynny’n bosibl. Mae hyn yn cynnwys canol trefi, ardaloedd siopa a phalmentydd ger ysbytai, ysgolion a gorsafoedd bysiau.

I gefnogi cymunedau lleol, mae oddeutu 500 o finiau halen a thwmpathau halen wedi’u lleoli ar draws Sir y Fflint. Mae’r rhain yn cael eu llenwi ar ddechrau tymor y gaeaf ac yn cael eu hail-lenwi yn ôl yr angen.

Meddai’r Cynghorydd Ted Palmer, Aelod Cabinet Priffyrdd, Asedau a Gwarchod y Cyhoedd: “Mae ein timoedd cynnal a chadw dros y gaeaf yn chwarae rôl hanfodol i’n helpu ni oll i deithio’n ddiogel o amgylch Sir y Fflint yn ystod misoedd oer y gaeaf, yn aml yn gweithio oriau anghymdeithasol ac mewn amodau heriol.

“Mae’r lorïau graeanu newydd yn dangos ein hymrwymiad parhaus i gadw Sir y Fflint i symud yn ystod tywydd gaeafol.

“Er nad yw’n bosibl graeanu bob ffordd a phalmant, mae ein timoedd yn gweithio’n ddiflino i flaenoriaethu’r llwybrau mwyaf prysur a lleoliadau allweddol, gan sicrhau y gall cymunedau aros yn gysylltiedig ac y gall siwrneiau hanfodol barhau mor ddiogel â phosibl.”

Gellir dod o hyd i fwy o wybodaeth am wasanaeth cynnal a chadw dros y gaeaf y Cyngor yn siryfflint.gov.uk/graeanu