Mae Llywodraeth Cymru yn ei gwneud yn ofynnol i bob awdurdod lleol ar draws Cymru ddatblygu 'Cynlluniau Creu Lleoedd' i nodi sut byddant yn nodi, cynllunio a darparu prosesau Creu Lleoedd ym mhob un o'u canol trefi. Mae hyn yn golygu rhoi anghenion canol trefi yn y dyfodol wrth wraidd polisïau, prosesau gwneud penderfyniadau a chamau gweithredu lleol.
Aildrefnu Digwyddiadau Ymgynghori Cynllun Creu Lleoedd
Mae’r digwyddiadau ymgynghori cyhoeddus ar y Cynllun Creu Lleoedd a oedd fod i gael eu cynnal ym Mwcle ddydd Iau 9 Mawrth 2023 a dydd Sadwrn 11 Mawrth 2023, ond a gafodd eu canslo yn sgil y tywydd garw diweddar, bellach wedi cael eu haildrefnu:
Dydd Iau 23 Mawrth 2023 6pm - 8pm Canolfan Gymunedol Llys Jiwbili, Bwcle
Dydd Sadwrn 25 Mawrth 2023 10am - 12 Caffi Refurbs Bwcle .
Mae Cyngor Sir y Fflint yn cydlynu datblygiad Cynlluniau Creu Lleoedd ar ran amrywiaeth o bartneriaid ar sail angen lleol pob canol tref ar draws Sir y Fflint.
Mae dull Creu Lleoedd Llywodraeth Cymru wedi’i alinio’n agos â’i ddull ‘Canol Trefi yn Gyntaf’ a lansiwyd yn 2020, sydd â’r nod o leoli gwasanaethau ac adeiladau mewn canol trefi i helpu i roi bywyd newydd i ganol trefi ar draws Cymru wedi pandemig Covid-19, gwerthiannau manwerthu sy’n gostwng a newidiadau i’r ffordd y caiff canol trefi eu defnyddio.
Pwrpas Creu Lleoedd yw cydlynu cynlluniau presennol a nodi materion mae pobl a lleoedd yn eu hwynebu, fel mannau cyhoeddus a mannau gwyrdd, siopau gwag, hygyrchedd ac anghenion masnachol a thai. Caiff hyn ei gyflawni trwy broses ymgynghori, yn ddigidol ac wyneb i wyneb a chaiff ei lywio gan ddata a dadansoddiad masnachol sy’n benodol i’r dref hefyd.
Mae gan bob un o ganol trefi Sir y Fflint wahanol anghenion oherwydd eu bod yn cynnwys cymysgedd unigryw o elfennau amgylcheddol, economaidd, cymdeithasol a diwylliannol, ac felly mae ganddynt wahanol gyfleoedd ar gyfer gweithgarwch Creu Lleoedd.
O ganlyniad i’r adborth o ymgynghoriadau digidol ac wyneb i wyneb a dadansoddiad dilynol, caiff amrywiaeth o flaenoriaethau eu nodi a fydd yn llywio cynllun gweithredu a gweledigaeth ar gyfer pob canol tref.
O’r canol trefi yn Sir y Fflint sydd angen Cynlluniau Creu Lleoedd, bydd y digwyddiadau ymgynghori cyntaf yn targedu Bwcle, Treffynnon a Shotton, a bydd Cei Connah, y Fflint, yr Wyddgrug a Queensferry yn dilyn o fewn y 2 flynedd nesaf.
Give My View
Mae’r pethau sy’n bwysig i chi’n bwysig i ni.
Cwestiynau Cyffredin
Mae Creu Lleoedd yn broses sy’n digwydd yng nghanol pob tref yng Nghymru; sydd â’r bwriad o osod gweledigaeth ar gyfer y dyfodol a nodi amrywiaeth o weithgareddau a fyddai o fudd i’r dref, y bobl leol a sefydliadau lleol.
Bydd gwybodaeth a gesglir drwy broses Creu Lleoedd yn cael ei defnyddio i lywio datblygiad blaenoriaethau’r dyfodol ar gyfer yr ardal sydd wedi’u nodi mewn cynllun ar gyfer ardal benodol fel canol tref (neu ran o dref/dinas fwy weithiau). Bydd y cynllun yn rhoi manylion am y camau gweithredu y mae angen eu cymryd a pha gamau sy’n debygol o gael eu gweithredu yn y 5-10 mlynedd nesaf gan amrywiaeth o bobl a sefydliadau i sicrhau newid cadarnhaol.
Drwy gael Cynlluniau Creu Lleoedd, mae Llywodraeth Cymru yn gobeithio y bydd awdurdodau lleol a’u partneriaid yn cyflawni dull mwy cydlynol o gydweithio yng nghanol ein trefi, gan nodi cyfleoedd ar gyfer buddsoddi a gwella’r ardal i drigolion lleol, busnesau ac ymwelwyr, ymhlith amrywiaeth o ganlyniadau cadarnhaol eraill.
Os ydych chi eisiau rhagor o wybodaeth cliciwch ar y ddolen ganlynol: https://cy.dcfw.org/creu-lleoedd/
Fel pob awdurdod lleol ledled Cymru, mae’n ofynnol i Gyngor Sir y Fflint ddatblygu Cynlluniau Creu Lleoedd a chynnwys pobl leol yn y broses o lunio cynnwys cynlluniau o’r fath mewn ymateb i anghenion pob ardal leol. Mewn ymateb i hyn, mae Cyngor Sir y Fflint yn ymgynghori â phobl leol yn ddigidol yn ogystal ag wyneb yn wyneb yn rhan o ddatblygiad ei Gynlluniau Creu Lleoedd ar gyfer canol trefi ledled Sir y Fflint.
Bydd canlyniadau’r holl ddigwyddiadau ymgynghori ac arolygon Creu Lleoedd yn cael eu defnyddio i lywio Cynlluniau Creu Lleoedd ar gyfer canol trefi Sir y Fflint. Bydd y canlyniadau o’r arolwg ar gael i chi edrych arnyn nhw a byddan nhw hefyd yn cael eu coladu â gwybodaeth arall a gasglwyd yn rhan o’r broses Cynllun Creu Lleoedd. Mae hyn yn cynnwys unrhyw ddata/gwybodaeth ystadegol a gasglwyd ar gyfer pob canol tref a’r wybodaeth a gasglwyd hefyd o ddigwyddiadau ymgynghori cyhoeddus Creu Lleoedd, yn ogystal â gwybodaeth a gafodd ei chyfnewid rhwng Cyngor Sir y Fflint a’i bartneriaid o’r sectorau gwirfoddol, preifat a chyhoeddus sy’n fudd-ddeiliaid allweddol yng nghanol ein trefi.
Bydd canlyniadau ymgynghoriadau Creu Lleoedd Sir y Fflint yn cael eu harddangos ar wefan Cyngor Sir y Fflint a byddan nhw ar gael o fis Ebrill 2023.
Gan fod saith prif dref yn Sir y Fflint y mae angen Cynlluniau Creu Lleoedd ar eu cyfer, mae Cabinet Cyngor Sir y Fflint (mae’r corff ar gyfer gwneud penderfyniadau’r Cyngor yn cynnwys aelodau etholedig lleol) wedi penderfynu y dylid cyflwyno’r gwaith fesul cam yn sgil yr adnoddau sydd ar gael a’r amser sydd ei angen i lunio cynlluniau ar gyfer pob canol tref ledled Sir y Fflint.
Cytunwyd y byddai Bwcle, Treffynnon a Shotton yn rhan o gyfran 1 gweithgaredd Creu Lleoedd yn Sir y Fflint, gwaith a fydd yn cael ei wneud yn 2023. Bydd y gwaith ar Gynlluniau Creu Lleoedd ar gyfer Cei Connah, y Fflint, yr Wyddgrug a Queensferry sy’n rhan o Gyfrannau 2 a 3, yn cael ei gwblhau yn 2024-25. Bydd rhagor o wybodaeth yn cael ei rhannu pryd fydd y rhain yn digwydd.
Bydd sesiynau galw heibio wyneb yn wyneb yn cael eu cynnal yng nghanol pob un o’r trefi. Bydd y digwyddiadau hyn yn rhoi cyfle i gasglu rhagor o sylwadau a chanfyddiadau gan bobl leol am ganol eu tref a’i dyfodol.
Bydd digwyddiadau wyneb yn wyneb yn cael eu cynnal ar y dyddiadau a’r lleoliadau canlynol:
Shotton
Canolfan Gymunedol Elmwood, Shotton
- Dydd Mawrth 28 Chwefror 2023 2pm-4pm
Eglwys Rivertown, Shotton
- Dydd Iau 2 Mawrth 2023 6pm-8pm
- Dydd Sadwrn 4 Mawrth 2023 10am-12pm
Bwcle
Caffi Cyfle, Bwcle
- Dydd Mawrth 7 Mawrth 2023 2pm-4pm
- Dydd Sadwrn 25 Mawrth 2023 10am - 12
Canolfan Gymunedol Jubilee Court
- Dydd Iau 23 Mawrth 2023 6pm-8pm
Treffynnon
Cystullu Sir y Fflint Treffynnon
- Dydd Mawrth 14 Mawrth 2023 2pm-4pm
Eglwys y Drindod Sanctaidd, Maes Glas
- Dydd Iau 16 Mawrth 2023 6pm-8pm
Canolfan Gymunedol Holway, Treffynnon
- Dydd Sadwrn 18 Mawrth 2023 10am-12pm
Mae Cyngor Sir y Fflint yn cydlynu datblygiad Cynlluniau Creu Lleoedd ar ran amrywiaeth o bartneriaid ar sail angen lleol pob canol tref ledled Sir y Fflint. Mae Llywodraeth Cymru yn annog awdurdodau lleol i gydweithio i ddatblygu a chyflawni Cynlluniau Creu Lleoedd.
Bydd yr arolygon ymgynghori cychwynnol ar gyfer Bwcle, Treffynnon a Shotton ar gael o 27 Ionawr 2023 hyd 12 Chwefror 2023.
Mae’r arolwg ar-lein ar gael ar Give My View. Os nad ydych chi’n gallu mynd ato o hyd, cysylltwch â regeneration@flintshire.gov.uk a byddwn ni’n gallu rhoi dolen i'r arolwg i chi.
Mae unrhyw ddata personol a gaiff ei roi wedi’i ddiogelu gan Reoliadau Diogelu Data Cyffredinol (GDPR) ac ni fydd unrhyw ddata’n cael ei rannu â phobl eraill. Ni fydd y wybodaeth y byddwch chi’n ei rhoi’n cael ei defnyddio at unrhyw ddiben arall heblaw ar gyfer datblygu Cynlluniau Creu Lleoedd yn Sir y Fflint.
Nid yw’r ymgynghoriadau’n casglu gwybodaeth fel lleoliad penodol nac yn adnabod unigolion na’u gwybodaeth bersonol, gan eithrio casglu codau post a chyfeiriadau e-bost – ond mae rhoi’r wybodaeth hon yn ddewisol wrth gwblhau’r arolwg ar-lein neu fynd i’r digwyddiadau wyneb yn wyneb.
Mae'r wybodaeth sydd wedi’i chasglu a'r atebion gan bob unigolyn yn ddienw ac yn cael eu cyflwyno’n rhan o'r data cyffredinol a gasglwyd ac felly golyga hyn na fydd modd adnabod ymatebion unigol.
Os oes gennych chi ragor o gwestiynau, mae croeso i chi anfon e-bost at regeneration@flintshire.gov.uk