Credyd Cynhwysol
Mae Credyd Cynhwysol yn daliad misol sengl i helpu gyda’ch costau byw ac mae’n darparu cefnogaeth os ydych yn gweithio ac ar incwm isel, yn chwilio am waith neu’n methu gweithio.
Mae’r budd-daliadau a’r credydau treth canlynol yn dod i ben ac yn cael eu disodli gan Gredyd Cynhwysol, o dan un taliad misol:
- Credyd Treth Plant
- Credyd Treth Gwaith
- Budd-dal Tai
- Cymhorthdal Incwm
- Lwfans Ceisio Gwaith yn Seiliedig ar Incwm
- Lwfans Cyflogaeth a Chymorth sy’n Gysylltiedig ag Incwm
Mae’r Adran Gwaith a Phensiynau yn ysgrifennu at y rhan fwyaf o bobl sy’n derbyn y budd-daliadau hyn i’w hysbysu bod angen iddynt hawlio Credyd Cynhwysol yn lle.
Mae’r llythyr hwn - a elwir yn Hysbysiad Symud - yn egluro beth sydd angen i chi ei wneud a phryd. Mae hefyd yn rhoi gwybodaeth am y cymorth sydd ar gael i barhau i dderbyn cefnogaeth gan y llywodraeth.
Dewch i wybod pryd rydych yn debygol o gael cais i symud i Gredyd Cynhwysol.
Mae’n bwysig nad ydych yn gwneud unrhyw beth nes i chi gael eich llythyr. Ni fyddwch yn cael eich symud yn awtomatig. Ar ôl i chi gael eich llythyr Hysbysiad Symud i Gredyd Cynhwysol, bydd angen i chi wneud cais am Gredyd Cynhwysol i barhau i gael cymorth ariannol. Bydd dyddiad cau wedi’i nodi yn eich llythyr. Bydd y dyddiad hwn 3 mis o’r dyddiad a anfonwyd y llythyr.
Bydd eich budd-daliadau presennol yn dod i ben cyn gynted ag y byddwch yn hawlio Credyd Cynhwysol ac ni fyddwch yn gallu dychwelwyd i’ch budd-daliadau presennol ar ôl i chi hawlio.
Os ydych eisiau help gyda’ch cais Credyd Cynhwysol neu os ydych yn pryderu am reoli eich incwm nes i chi gael eich taliad Credyd Cynhwysol cyntaf, mae mathau gwahanol o gefnogaeth ar gael.
Fodd bynnag, o fis Ebrill 2017, ehangwyd Credyd Cynhwysol i’r holl hawlwyr newydd, sy’n cael ei alw’n Gredyd Cynhwysol ‘gwasanaeth llawn’, ac mae’n disodli’r chwe budd-dal yma:
- Budd-dal Tai
- Cymhorthdal Incwm
- Lwfans Ceisio Gwaith
- Lwfans Cymorth Cyflogaeth
- Credyd Treth Plant
- Credyd Treth Gwaith
Mae hyn yn golygu nad ydych yn gallu gwneud hawliad ar gyfer Budd-Dal Tai, ond byddwch yn gallu hawlio Credyd Cynhwysol. Mae swm eich Credyd Cynhwysol yn dibynnu ar eich amgylchiadau a’ch incwm. Mae eich taliad Credyd Cynhwysol wedi’i ffurfio o ‘lwfans safonol’ sylfaenol ac unrhyw symiau ychwanegol sy’n gymwys i chi. Gallwch gael mwy o arian i’ch helpu i dalu eich costau tai, mae faint rydych yn ei gael yn dibynnu ar eich amgylchiadau.
Os ydych yn byw mewn tŷ â chymorth, ni fydd eich hawliad am Gredyd Cynhwysol yn cynnwys unrhyw gostau tai. Bydd angen i chi hawlio Budd-dal Tai gan yr awdurdod lleol.
Am fwy o wybodaeth, ewch i www.gov.uk/credyd-cynhwysol
Digwydd hyn pan fyddwch yn adrodd am newid amgylchedd cymwys i’ch budd-dal etifeddol. Dyma rai enghreifftiau o pa bryd fyddwch chi’n symud i Gredyd Cynhwysol:
- Rydych chi’n unig riant yn cael Cymhorthdal Incwm ac mae eich plentyn ieuengaf yn troi’n 5 oed neu’n gadael yr aelwyd yn barhaol
- Rydych chi’n dod yn gyfrifol am blentyn am y tro cyntaf
- Rydych chi’n rhoi’r gorau i weithio oherwydd salwch
- Rydych chi’n symud cyfeiriad i ardal wasanaeth lawn
- Rydych chi'n hawlio credydau treth ac yn gwahanu o'ch partner
Am fwy o wybodaeth am rhestr lawn o feini prawf mudo naturiol, ewch i www.gov.uk/credyd-cynhwysol
Mae’r llywodraeth yn disgwyl bron i bawb hawlio a rheoli eu Credyd Cynhwysol ar-lein. I hawlio credyd cynhwysol, rhaid i chi sefydlu cyfrif credyd cynhwysol i lenwi’r cais, byddwch hefyd yn rheoli eich hawliad parhaus ar-lein drwy’r cyfrif hwn. Byddwch angen mynediad ar-lein rheolaidd felly i gadw eich amgylchiadau’n gyfredol a sicrhau eich bod yn cael eich talu’n gywir.
Mae cyfrifon credyd cynhwysol wedi’u llunio i weithio'r un fath ar gyfrifiaduron bwrdd gwaith, gliniaduron, dyfeisiau llechen a ffonau clyfar.I sefydlu a chynnal eich cyfrif, bydd angen y canlynol arnoch:
- cyfrif e-bost yr ydych yn ei ddefnyddio’n rheolaidd
- y gallu i lenwi ffurflen ar-lein a nodi data personol
- y gallu i greu a llwytho dogfennau megis eich CV
- sganio neu dynnu lluniau o dystiolaeth a llwytho’r rhain i’ch cyfrif
Cliciwch ar y ddolen hon i wylio fideo sy’n egluro sut i hawlio Credyd Cynhwysol;
Mae elfen costau tai Credyd Cynhwysol, sy’n disodli Budd-dal Tai i denantiaid, yn cael ei thalu’n uniongyrchol i chi, yn hytrach na’i thalu i’ch landlord, fel sy’n digwydd gyda llawer o hawlwyr Budd-dal Tai presennol.
Fodd bynnag, gall y tenantiaid hynny sydd angen cefnogaeth cyllidebu neu sy’n mynd i ôl-ddyledion rhent ar ôl mis neu ddau, gael eu helfen rhent ac ôl-ddyledion rhent wedi'u talu'n uniongyrchol i'r landlord, am gyfnod dros dro.
I gael Credyd Cynhwysol, byddwch angen cyfrif gyda banc, cymdeithas adeiladu neu undeb credyd. Gall cyfrifon cerdyn Swyddfa Bost fod yn rhy gyfyngedig ar gyfer Credyd Cynhwysol.
Mae’r llywodraeth yn cydnabod y bydd symud i un taliad aelwyd misol yn newid sylweddol i’r ffordd y caiff y rhan fwyaf o fudd-daliadau eu talu ar hyn o bryd, ac mae wedi cyflwyno Trefniadau Talu Amgen sy’n darparu’r cymorth canlynol dros dro os cewch eich nodi fel un sydd angen cefnogaeth ychwanegol:
- Talu am yr elfen dai o Gredyd Cynhwysol fel Taliad a Reolir yn uniongyrchol i'r landlord
- Amlach na thaliadau misol
- Dyfarndaliad wedi’i haneru rhwng partneriaid
Byddwch hefyd yn cael cynnig Cefnogaeth Cyllidebu Personol os ydych yn cael eich ystyried yn ddiamddiffyn ac angen cyngor ariannol i’ch helpu i reoli eich arian bob mis, a thalu eich biliau ar amser. Gallwch gael cefnogaeth unrhyw bryd, unwaith y bydd eich hawliad am Gredyd Cynhwysol wedi’i wneud.
Cliciwch y ddolen hon i lenwi Ffurflen Cefnogaeth Cyllidebu.
Os oes gennych chi unrhyw ymholiadau pellach cysylltwch â’r Tîm Ymateb Diwygio'r Gyfundrefn Les ar 01352 704848 neu anfonwch e-bost at welfarereformresponse@flintshire.gov.uk.
Gallwch gael cymorth wrth wneud hawliad ar-lein, diweddaru eich cyfrif a nodi newid mewn amgylchiadau. Mae ein staff wedi’u hyfforddi i ddarparu help a chefnogaeth os oes angen ac mae ar gael yn unrhyw un o’n Canolfannau Cyswllt.
Nodwch nad ydyw Credyd Cynhwysol yn cynnwys unrhyw gymorth tuag at eich costau Treth y Cyngor. Felly bydd angen i chi ymgeisio am Gymorth Treth y Cyngor ar-lein.
Mae Taliadau Dewisol Tai yn daliadau y gellir eu gwneud gan y Cyngor i bobl sy'n cael Credyd Cynhwysol (Elfen Dai), ond a all fod angen rhagor o gymorth ariannol gyda'u costau tai. Cliciwch yma i wneud cais.
Mae’n bosibl y bydd gennych hawl i gael Prydau Ysgol Am Ddim (eFSM) a Grant Hanfodion Ysgol hefyd os ydych chi’n hawlio Credyd Cynhwysol. Cliciwch ar y ddolen hon i wneud cais.