Sefydlwyd grŵp Cymuned Cyfeillgar i Ddementia ac Oed Treffynnon yn 2018 gyda’r nod o wneud Treffynnon a’r ardal gyfagos yn gymunedau diogel a chynhwysol sy’n cynnig gweithgareddau/cyfleusterau sy’n galluogi pawb i heneiddio’n dda. Un o brif nodau’r grŵp yw codi ymwybyddiaeth am ddementia fel bod pobl â dementia a’u gofalwyr yn cael eu cefnogi i fyw bywydau llawn a bywiog.

Yn 2019, derbyniodd y grŵp grant gan Gronfa Gymunedol Fferm Wynt Gwynt y Môr i ddathlu prosiect ymgysylltu â’r gymuned gyda 6 ysgol a chymuned yn ardal wledig gogledd Sir y Fflint.  Defnyddiwyd drama a pherfformio yn y prosiect fel cyfrwng ar gyfer gweithio gyda phlant ysgol gynradd i wella eu dealltwriaeth o ddementia a sut gall y gymuned ehangach gymryd camau syml i alluogi rhagor o bobl ddiamddiffyn i deimlo eu bod yn ddiogel ac yn cael eu cefnogi i barhau i gymryd rhan weithredol yn y gymuned.  Roedd y prosiect yn cynnwys y camau canlynol:

• Dysgodd staff a disgyblion ym mhob ysgol am ddementia a dod yn Ffrindiau Dementia.
• Gweithiodd ymarferydd celfyddydau cymunedol gyda grŵp bychan o blant ym mhob ysgol i ddatblygu perfformiad ar ddementia a heneiddio’n dda a rannwyd gyda chymuned yr ysgol.
• Cynhaliwyd cyfres o ddigwyddiadau diogelwch cymunedol yn yr ardal, yn darparu cyfleoedd i oedolion hŷn ddysgu am yr amrywiaeth o wasanaethau a chefnogaeth sydd ar gael i’w galluogi i heneiddio’n dda.
• Cafwyd dathliad diwedd prosiect ym Mharc Dyffryn Maes Glas i oedolion hŷn (gan gynnwys pobl sy’n byw â dementia) a disgyblion o bob ysgol, i annog y cenedlaethau i ddysgu gyda’i gilydd a galluogi plant i ddefnyddio eu sgiliau cyfathrebu newydd a’u dealltwriaeth o ddementia a heneiddio’n dda. 

Mae’r prosiect wedi gwireddu’r canlynol:

• cymerodd 214 o ddisgyblion (6 - 11 oed) ran mewn sesiynau ymwybyddiaeth Ffrindiau Dementia a dod yn Ffrindiau Dementia
• Daeth 17 o staff ysgol yn Ffrindiau Dementia
• Mynychodd 40 o ymwelwyr ddigwyddiadau diogelwch cymunedol, gan dderbyn gwybodaeth a chyngor a chefnogaeth ddilynol gan 15 o sefydliadau statudol a thrydydd sector
• Mynychodd 102 o ddisgyblion a 24 o oedolion hŷn y digwyddiad Dathlu a chafwyd adborth cadarnhaol gan gyfranogwyr.